Վրացական Georgia times կայքի փոխանցմամբ, Regnum լրատվական գործակալությանը տված հարցազրույցի ժամանակ Մամուկա Արեշիձեն անդրադարձել է վրացական խորհրդարանի կողմից ռազմական տարանցման համաձայնագրի չեղյալ հայտարարմանը.
«Բնականաբար, Վրաստանի այդ որոշումը կհարուցի Ռուսաստանի զայրույթը: Սակայն իրավական պլանում գոյություն չունեն վիճելի խնդիրներ: Վրացական կողմի այդ դիրքորոշումը շաղկապված է Աբխազիայում և Հարավային Օսիայում տեղի ունեցող իրադարձություններին: Դա կհանգեցնի նրան, որ Ռուսաստանը ստիպված կլինի իր ռազմական բեռները Հայաստան առաքել Իրանի տարածքով:
Հասկանալի է, որ Ադրբեջանը Ռուսաստանին չի թույլատրի իր տարածքով ռազմական բեռներ փոխադրել Հայաստան (Գյումրու ռուսական ռազմաբազա): Այժմ փակվում է նաև Վրաստանի ճանապարհը: Ռուսաստանին այլ բան չի մնում, քան Իրանի տարածքից օգտվելը: Իհարկե, դա շատ բարդ և թանկարժեք ճանապարհ է, սակայն Ռուսաստանն այլ ելք չունի»:
Հիշեցնենք, որ երեկ, Վրաստանի նախագահ Միխեիլ Սաակաշվիլիի նախաձեռնությամբ, վրացական խորհրդարանը միաձայն որոշեց չեղյալ հայտարարել 2006 թվականի մարտի 31-ին Ռուսաստանի հետ կնքած՝ Վրաստանի տարածքով ռազմական բեռների ու անձնակազմի փոխադրման մասին համաձայնագիրը: