Երևանի Կենտրոն և Նորք-Մարաշ վարչական շրջանների ընդհանուր իրավասության դատարանը մերժել է սոցիալական ապահովության պետական ծառայության Երևան քաղաքի վճարային ծառայության պետ Հ.Գրիգորյանի կալանքը 296 մլն դրամի գրավով փոխելու մասին միջնորդությունը։
Հ.Գրիգորյանը որպես մեղադրյալ է անցնում ՀՀ աշխատանքի և սոցիալական հարցերի նախարարության սոցիալական ապահովության պետական ծառայության պետ Վազգեն Խաչիկյանի և մյուսների քրեական գործով։ Ըստ մեղադրանքի՝ Վ.Խաչիկյանը ծառայության մի շարք պաշտոնատար և պատասխանատու անձանց հետ, կազմակերպված խմբով, 2006–2010թթ. ընկած ժամանակահատվածում, օգտագործելով իրենց պաշտոնեական դիրքը, պաշտոնեական կեղծիք կատարելու, այն է՝ կենսաթոշակի կասեցված վճարումը վերսկսելու վերաբերյալ վճարման իրավունք վերապահող կեղծ դիմումներ պատրաստելով կամ առանց այդ դիմումների վճարային ցուցակներում կենսաթոշակառուների ստորագրությունները կեղծելու միջոցով անհիմն ելքագրել և յուրացման եղանակով հափշտակել են իրենց վստահությանը հանձնված, մահացած կամ ՀՀ տարածքից բացակայող կենսաթոշակառուների վճարումը կասեցված կենսաթոշակի առանձնապես խոշոր չափերի, ընդհանուր՝ 260.956.681 ՀՀ դրամ գումարները:
Հովհաննես Գրիգորյանի պաշտպան Արա Զաքարյանը այսօրվա դատական նիստում միջնորդել էր՝ իր պաշտպանյալի նկատմամբ ընտրված խափանման միջոցը՝ կալանավորումը գրավով փոխարինելու մասին։ Ընդ որում, որպես գրավի ապահովման միջոց փաստաբանն առաջարկել էր ընդհանուր առմամբ 296 մլն դրամի արժեքով գրավ, որից 10 միլիոնը դրամի ձևով, իսկ մնացածը՝ անշարժ գույքի, ինչը դատարանը մերժեց։
«Փաստինֆո»
