Հռոմի պապ Ֆրանցիսկոսը Վատիկանի Սուրբ Պետրոսի հրապարակում գահակալության արարողության ժամանակ իր քարոզում հավատացյալներին կոչ է արել հարգել բոլոր կենդանի արարածներին և շրջակա միջավայրը: Այս մասին հայտնում է RIA Novosti-ն:
«Հո´գ տարեք ժողովրդի մասին, սիրով հոգացե´ք բոլորի, յուրաքանչյուր մարդու, հատկապես երեխաների, տարեցների, առավել թույլերի մասին»,- ասել է հովվապետը՝ դիմելով բազմահազարանոց հավաքվածներին:
Առանձին խնդրանքով Ֆրանցիսկոս պապը դիմել է քաղաքական առաջնորդներին՝ նրանց կոչ անով պաշտպանել և հոգ տանել ժողովրդի, բնության և «Աստծո արարման» համար: «Թույլ չտանք, որ ավերածություններն ու մահն ուղեկցեն մեր աշխարհը»,- ասել է Հռոմեա-կաթոլիկ եկեղեցու առաջնորդը:
«Մենք չպետք է վախենանք բարությունից ու քնքշությունից»,-հավելել է Ֆրանցիսկոսը հավաքվածների ծափահարությունների ներքո:
Քարոզից հետո Հռոմի պապն աղոթել է 5 լեզվով՝ ռուսերեն, ֆրանսերեն, արաբերեն, սուախիլի լեզվով և չինարեն:
