Գագիկ Ծառուկյանի՝ Աբովյան 5 հասցեում գտնվող կիսակառույցի շուրջ դեպքերը շարունակում են զարգանալ: Հիշեցնենք, որ այդ հասցեում «Բարգավաճ Հայաստան» կուսակցության նախկին ղեկավարը որոշել էր հյուրանոցային համալիր կառուցել, բայց շենքի առաջին մի քանի հարկերը կառուցելուց հետո շինարարությունը կանգնեցրել է արդեն 6-7 տարի: Այդ շինարարությունը կասեցվել է Աբովյան 3/3 հասցեում գտնվող շենքի հետ կապված որոշ խնդիրներ ունենալու պատճառով և դատական վճիռների արդյունքում:
«Առաջին լրատվական»-ը Նոր Հաճնում Գ. Ծառուկյանի կառուցած եկեղեցու օծման արարողության ժամանակ «Մուլտի Գրուպ» ընկերության տնօրեն Սեդրակ Առուստամյանից հետաքրքրվել էր, թե ի վերջո երբ են վերսկսելու շինարարությունը և այն ավարտին հասցնելու, չէ որ այդ կիսակառույցը աղճատում է Երևանի կենտրոնի տեսքը, նա պատասխանել էր, որ նախագծային աշխատանքներն ավարտին հասցնելու փուլում են, որից հետո նոր կշարունակեն շինարարությունը, և որ «Կեմպինսկի» հայտնի բրենդի հետ նախատեսում են այնտեղ հյուրանոց կառուցել: Հրապարակումից հետո Աբովյան 3/3 շենքի սեփականատեր Վոլոդյա Բեջանյանը մեզ տեղեկացրեց, որ շինարարությունը կասեցվել է, քանի որ այն կառուցվել է խախտումներով՝ անտեսելով հարակից շենքի հետ սեյսմիկ կարը պահպանելու քաղաքաշինական նորմը:
Այս անգամ Վ. Բեջանյանը մեզ հետ զրույցում ասաց, թե ինքը տեղեկացել է, որ առաջիկայում հրավիրվելու է քաղաքաշինական խորհրդի նիստ, որի ընթացքում քննարկվելու է Աբովյան 5 հասցեում գտնվող այդ կիսակառույցի ճակատագիրը, նախագիծը, և միգուցե այս անգամ այն հաստատեն: Վ. Բեջանյանը ցանկանում է մասնակցել այդ նիստին, քանի որ այն առնչվում է իր շահերին: Եվ դրա համար նա օգոստոսի 14-ին նա Երևանի քաղաքապետարան ու Քաղաքաշինության նախարարություն է ուղարկել Երևանի Կենտրոն և Նորք-Մարաշ համայնքների ընդհանուր իրավասության դատարանի վճռի և Դատական ակտերի հարկադիր կատարման գրասենյակի կատարողականի պատճեները: Նա մտահոգություն ունի, որ այս անգամ Գ. Ծառուկյանին կարող է հաջողվել վերսկսել կոպիտ խախտումներով սկսած իր շինությունը՝ շրջանցելով դատարանի և ԴԱՀԿ-ի որոշումները:
Նաև այս գերատեսչություններին տեղեկացրել է, որ ինքը ցանկանում է մասնակցել քաղաքաշինական խորհրդի նիստին, որպեսզի մասնակցի իր շահերին և իր կնոջը՝ Աննա Մարտիրոսյանին պատկանող շինությանն առնչվող քննարկմանը: «Խնդրում եմ այս վճիռներն ընդունել ի գիտություն և Աբովյան 5 հասցեում կառուցվելիք շինարարության նախագծի և շինթույլտվության վերաբերյալ քննարկման ժամանակ ընդգրկեք նաև ինձ, քանի որ ես ունեմ ներքին համոզմունք և վստահ եմ, որ քննարկումը լինելու է թափանցիկ և իմ՝ որպես Աբովյան 3 շենքի սեփականատիրոջ ներկայությունը չի խանգարի»,- նշված է այս գերատեսչություններին ուղղված գրության մեջ:
Հիշեցնենք նաև, որ այս տարի՝ փետրվարի 12-ին, Հանրապետական կուսակցության խորհրդի նիստի ժամանակ Սերժ Սարգսյանը հայտարարեց, թե պատկան մարմինները պետք է ստուգումներ սկսեն Գ. Ծառուկյանին պատկանող ընկերություններում և պարզեն, թե արդյոք ճիշտ են այն խոսակցությունները, որ այնտեղ խախտումներ ու չարաշահումներ կան: Այս հայտարարությունից հետո ԴԱՀԿ-ը կրկին այցելել է Աբովյան փողոցի այս կիսակառույցը, և սեփականատերերի մոտ հույս է արթնացել, թե այս անգամ վերջապես կվերականգնվեն իրենց իրավունքները: Բայց, ինչպես հայտնի է, Գ. Ծառուկյանը հայտարարեց քաղաքականությունից դուրս գալու մասին, հրաժարվեց իր հիմնադրած «Բարգավաճ Հայաստան» կուսակցությունից: Իսկ իշխանությունները դադարեցրին նրան ու նրան պատկանող ընկերություններին օրինական դաշտ բերելու գործընթացը: ԴԱՀԿ-ն էլ կրկին դադարեց այդ կիսակառույցի նկատմամբ կատարել իր պարտականությունները:
Իսկ մեր հրապարակումից հետո իշխանությունների հետ հարաբերությունները բարելաված Գ. Ծառուկյանը հավանաբար ցանկացել է պետական ատյաններից ստանալ իր կիսակառույցին առնչվող բոլոր փաստաթղթերն ու ավարտին հասցնել այդ շինությունը, որը արդեն մամուլում իր համար դարձել է բազմաթիվ անցանկալի հրապարակումների առարկա:
