Աշխարհում տուբերկուլյոզի դեմ պայքարի ծրագրերը ֆինանսավորելու համար անհրաժեշտ է հավելյալ 1.6 մլրդ դոլար, որոնք կարող էին դեղամիջոցներով ապահովել 17 մլն մարդու և 3 տարում փրկել 6 մլն մարդու՝ ասվում է Առողջապահության համաշխարհային կազմակերպության (ԱՀԿ) հայտարարության մեջ, որը հրապարակված է կազմակերպության պաշտոնական կայքում:
ԱՀԿ-ի կանխատեսումների համաձայն՝ ցածր ու միջին եկամուտով 118 երկիր ի վիճակի են հատկացնել տարեկան 3.2 մլրդ դոլար՝ տուբերկուլյոզի դեմ պայքարելու նպատակով, սակայն այդ միջոցները չեն բավարարի հիվանդության՝ դեղերի նկատմամբ կայուն տեսակների դեմ արդյունավետորեն հակազդելու համար:
ԱՀԿ գլխավոր տնօրեն Մարգարեթ Չենն ու ՁԻԱՀ-ի, տուբերկուլյոզի ու մալարիայի դեմ պայքարի գլոբալ հիմնադրամի ղեկավար Մարկ Դայբկը կարծում են, որ անհրաժեշտ է ազգային բյուջեներից մոբիլիզացնել զգալի ֆինանսական միջոցներ, ինչպես նաև ներգրավել միջազգային հովանավորների:
2011թ. աշխարհում տուբերկուլյոզից մահացել է 1.4 մլն մարդ: Մահացության ամենաբարձր ցուցանիշը գրանցվել է Աֆրիկայում:
