«Քաղաքացիական գիտակցություն» ՀԿ-ի և «Ժառանգության» կուսակցության երիտասարդների միջև երեկ տեղի ունեցած ծեծկռտուքի փաստի առթիվ հարուցվել է քրեական գործ՝ ՀՀ քրեական օրենսգրքի 258 հոդվածի 3-րդ մասի 1-ին կետի հատկանիշներով (Խուլիգանություն, որը կատարվել է մի խումբ անձանց կողմից):
Հիշեցնենք, որ երեկ «Քաղաքացիական գիտակցություն» ՀԿ-ի գրասենյակում ծեծկռտուք էր տեղի ունեցել։ Ըստ ՀԿ-ի ղեկավար Նարեկ Սամսոնյանի՝ «Ժառանգություն» կուսակցության վարչության անդամ Հովսեփ Ղազարյանը ընկերների հետ այցելել է իրենց գրասենյակ, հարձակվել իրենց վրա, որի ժամանակ ինքը մարմնական վնասվածքներ է ստացել։ Սամսոնյանի խոսքով՝ իրենց ծեծի ենթարկելու պատճառը եղել է «Առաջին լրատվական»-ին տված հարցազրույցի ժամանակ եռյակին ուղղված սուր քննադատությունները, որի ժամանակ ասել է՝ մինչ այս գործած բոլոր կուսակցությունները, որոնք գործունեություն են ծավալել Հայաստանում, ամբողջությամբ ֆիասկոյի մեջ են և որևէ արդյունք չեն տվել:
«Ժառանգության» վարչության փոխնախագահ Արմեն Մարտիրոսյանն էլ ասում էր, որ իրենց տղաները սադրանքի զոհ են դարձել։
Նշենք, որ ծեծկռտուքի ժամանակ Նարեկ Սամսոնյանը կրակոցներ է արձակել իր մոտ եղած գազային ատրճանակից։