6 տարի առաջ՝ 2008-ի մարտյան իրադարձություններից հետո, Բելգիայում քաղաքական ապաստան ստացած, ՀԺԿ նախկին համակիր Գրիշա Վիրաբյանն այս օրերին Հայաստանում է և մասնակցում է իրեն առնչվող քրեական գործի քննությանը, դատաբժշկական փորձաքննություններին: Այսօր Վիրաբյանը ոստիկանությունում մասնակցում էր առերեսման և ենթադրվում էր, որ պետք է առերեսում տեղի ունենար Երևանի ոստիկանապետ Աշոտ Կարապետյանի հետ, սակայն նա այսօր առերեսման չի եկել. Վիրաբյանը լիահույս է, որ Կարապետյանը կգա առերեսման, ինչպես խոստացել է՝ կնայի իր աչքերի մեջ ու կխոսի կատարվածի մասին:
Ամեն դեպքում և՛ Վիրաբյանը, և՛ նրա պաշտպան Ալեքսանդր Սիրունյանը դժգոհ են գործի քննության ընթացքից, որը ձգվում է արդեն 10 ամիս և հանգուցալուծումը չի երևում:
Սիրունյանն «Առաջին լրատվական»-ի հետ զրույցում ասաց, որ տարօրինակ է գործի քննության այս դանդաղումը, քանի որ ամեն ինչ պարզից էլ պարզ է: Գրիշա Վիրաբյանի ծեծի, բռնությունների, դրանց հետևանքով ստացած վնասվածքների փաստը Մարդու իրավունքների եվրոպական դատարանը վաղուց հաստատված է համարել, վճիռ է հրապարակել և հիմա՝ դեպքից 11 տարի անց նոր դատաբժշկական փորձաքննության նշանակումը, փաստաբանն աննպատակահարմար է համարում:
Գրիշա Վիրաբյանի կարծիքով էլ, իրավապահները, թերևս, համառում են, ձգձգում են գործի քննությունը՝ հույս ունենալով, որ ինքը շուտով կգնա Հայաստանից: «Բայց ես պատրաստ եմ հրաժարվել Եվրոպայում ստացած իմ կարգավիճակից, բայց այս գործը պետք է հասցնեմ իր տրամաբանական ավարտին, և ինձ խոշտանգած ոստիկանները պետք է պատասխանատվության ենթարկվեն»,- ասաց Վիրաբյանը:
Առավել մանրամասն՝ տեսանյութում:
