Սիրիայում իշխանությունների և ընդդիմության ներքին զինված հակամարտությունը երկու տարում ընդգրկել է երկրի գրեթե ողջ տարածքը՝ քաղաքացիական հասարակությանը չթողնելով անվտանգ շրջաններ, որտեղ հնարավոր կլինի թաքնվել: Այս մասին ասվում է Մարդասիրական օպերացիաների համակարգման ՄԱԿ-ի տարածաշրջանային վարչության զեկույցում՝ հայտնում է RIA Novosti-ն:
Կազմակերպության տվյալներով՝ հակամարտության հետևանքով զոհվել է մոտ 70 հազար մարդ, ավելի քան 4 մլն սիրիացի երկրի ներսում շտապ մարդասիրական օգնության կարիք ունի, իսկ փախստականների թիվը մեկ տարում 33 հազարից հասել է 1.1 միլիոնի և շարունակում է օրական մի քանի հազարով աճել:
Փաստաթղթում ասվում է, որ հակամարտության ազդեցությունը նկատելի է յուրաքանչյուր ընտանիքի համար՝ դա վերաբերում է կրթության անհասանելիությանը, աղքատությանը, սովին, խմելու ջրի սղությանը, հիվանդություններին, բժշկական օգնության բացակայությանը:
Զեկույցում նշվում է, որ ոչ մի մարդասիրական օգնություն չի փոխարինի քաղաքական կարգավորմանը: «Դա ժամանակավոր մեղմացում է, ոչ թե բուժում: Առաջնահերթը հակամարտության քաղաքական լուծումն է»,- ընդգծել է ՄԱԿ-ը:
