Google ինտերնետ-հսկայի կողմից Alphabet տեխնոլոգիական կոնգլոմերատի ստեղծումը դիպել է գերմանական BMW AG ավտոարտադրողի շահերին: Այս մասին հայտնում է Deutsche Welle-ը:
Հաղորդվում է, որ իր նոր գլխավոր ընկերության համար Google-ի ընտրած Alphabet անվանումը գրանցված է որպես BMW-ի «դստեր» ապրանքանշան, որը շարժական լուծումներ է առաջարկում բիզնեսի համար, այդ թվում՝ լիզինգ և բեռնափոխադրումների ծառայություն:
BMW-ի մամլո ծառայությունում հայտարարել են, որ Google-ի դեմ որևէ իրավաբանական քայլ առայժմ չի նախատեսվում: Այդուհանդերձ, BMW-ն կստուգի՝ արդյոք տվյալ դեպքում չի՞ խախտվում ապրանքանիշների մասին օրենսդրությունը: Փորձագետները նշում են, որ ապրանքանիշի իրավունքների խախտում առաջանում է միայն այն դեպքում, եթե երկու ընկերությունները կամ դրանց արտադրանքը շփոթելու հավանականություն կա:
Alphabet ապրանքանիշով շուկա դուրս գալու դեպքում ընկերությունը կարող է բախվել մեծաթիվ դատավարությունների՝ նշում է DW-ն. միայն ԱՄՆ-ում ներկայումս գրանցված է 103 ապրանքանիշ, որոնց անվան մեջ պարունակվում է Alphabet բառը կամ դրա տարբերակները:
