Հռոմի նորընտիր պապ Ֆրանցիսկոսի գահակալությանը ներկա կգտնվի Հայ կաթողիկե եկեղեցու առաջնորդ Ներսես-Պետրոս 19-րդ պատրիարքը: Այս մասին «Արմենպրես»-ի հետ զրույցում ասել է Հայաստանի, Վրաստանի, Ռուսաստանի և Արևելյան Եվրոպայի Կաթողիկե եկեղեցիների առաջնորդ Ռաֆայել արքեպիսկոպոս Մինասյանը:
«Ցավոք, ես չեմ կարող ներկա գտնվել Հռոմի նորընտիր պապի գահակալությանը, սակայն Հայ կաթողիկե եկեղեցին գահակալությանը ներկայացնելու է Ներսես Պետրոս 19-րդ պատրիարքը»,- ասել է Ռաֆայել Սրբազանը:
Ռաֆայել արքեպիսկոպոս Մինասյանը մեկնելու է Լեհաստան` հայկական ձեռագրերի պահպանության հետ կապված գործերով: «Կհանդիպեմ Լեհաստանի հայ համայնքի, կաթողիկե եկեղեցու կարդինալների և պետական գործիչների հետ»,- ասել է սրբազանը:
Ռաֆայել արքեպիսկոպոս Մինասյանը նաև հայտնել է, որ Հռոմի պապի հետ իր հանդիպումը նախատեսված է ապրիլի 14-ին, և հույս հայտնել, որ հայերի հետ կապված հարցերին ևս անդրադարձ կլինի:
Պապի գահակալման արարաղությունը տեղի կունենա մարտի 19-ին:
