The Washington Post օրաթերթը և ABC News հեռուստաալիքն անցկացրել են հարցում, որի արդյունքում պարզվել է, որ չնայած լուրջ տնտեսական խնդիրներին, որոնց առաջ կանգնել է Սպիտակ տան ներկայիս վարչակազմը, նախագահ Բարաք Օբաման շարունակում է մնալ ԱՄՆ ամենավստահելի քաղաքական գործիչը:
Հետազոտությունները ցույց են տվել, որ հարցվածների 47%-ն աջակցում է Օբամային նախագահի պաշտոնում: Դա 7%-ով պակաս է, քան այս տարվա հունվար ամսին: Օբամայի գործողությունները չեն աջակցում հարցվածների 50%-ը, ինչը շատ մոտ է 2010 թ. առավելագույն ցուցանիշներին, երբ Օբամային անվստահություն էր հայտնում ամերիկացիների 52%-ը:
Նախագահական քարոզարշավի մասին հայտարարած Օբամայի օգտին առաջիկա ընտրությունների ժամանակ պատրաստվում է քվեարկել հարցվածների 28%-ը, 25%-ը դեռ որոշում չեն կայացրել: Իսկ ահա 45%-ը պատրաստվում է դեմ քվեարկել Օբամային:
Թեպետ վստահությունը Օբամայի նկատմամբ նվազել է, սակայն նրա հիմնական հակառակորդներն էլ չունեն ամերիկացիների մեծամասնության վստահության քվեն: Հանրապետականների ամենահավանական թեկնածուն` Միթ Ռոմնին, ունի ամերիկացիների 16%-ի աջակցությունը, գործարար Դոնալդ Տրամպը` 8%-ը: Նախորդ ընտրություններում հանրապետականների կողմից առաջադրված փոխնախագահի թեկնածու Սարա Փեյլինն ունի ամերիկացիների 5%-ի աջակցությունը:
Եթե ընտրությունները կայանային այսօր, ապա Օբամայի օգտին կքվեարկեր ընտրողների 56%-ը, եթե նա մրցակցեր Սարա Փեյլինի հետ, որը կստանար ձայների 37%-ը: Եթե գործող նախագահի մրցակիցը լիներ Միթ Ռոմնին, ապա Օբաման կստանա ընտրողների ձայների 49%-ը, Միթ Ռոմնին` 45%-ը: Տրամպի դեպքում Օբաման կստանար 52%, Տրամպը` 39%:
