ՀՀ արդարադատության նախարարության քրեակատարողական վարչության պետ, գեներալ-մայոր Արթուր Օսիկյանը ՔԿՎ վարչակազմի ուղեկցությամբ աշխատանքային շրջայց է կատարել ՀՀ ԱՆ «Կոշ» և «Արթիկ» քրեակատարողական հիմնարկներում: Ինչպես տեղեկացրին ՀՀ ԱՆ ՔԿՎ հանրային կապերի բաժնից, շրջայցի նպատակն էր ծանոթանալ ՔԿ հիմնարկների՝ դատապարտյալների և կալանավորված անձանց պահման վայրերի պայման ներին, խոհանոցների, սանհանգույցների սանիտարահիգիենիկ վիճակին, առկա խորքային ուսումնասիրություն և լուծում պահանջող այլ խնդիրներին:
Մասնավորապես, «Կոշ» ՔԿ հիմնարկում Արթուր Օսիկյանը եղել է պատժախցերում, կատարել մի շարք դիտարկումներ և զրուցել պատժախցերում գտնվող դատապարտյալների հետ:
Այնուհետև տեղի է ունեցել հանդիպում քրեակատարողական հիմնարկի վարչակազմի հետ, որի ընթացքում բարձրացված որոշ հարցերի լուծումներ տրվել են տեղում, մի շարք խնդիրների լուծման համար էլ հանձնարարակններ են տրվել իրավասու պաշտոնատար անձանց:
ՀՀ ԱՆ «Արթիկ» քրեակատարողական հիմնարկում Արթուր Օսիկյանը ՔԿ հիմնարկի վարչակազմի ուղեկցությամբ եղել է հիմնարկի հանձնուքների ընդունման սենյակում, զրուցել դատապարտյալների հարազատների հետ, ապա ուղևորվել բնակելի գոտի, հանդիպել դատապարտյալների հետ, ծանոթացել նրանց հուզող հարցերին:
ՔԿՎ պետի շրջայցի հաջորդ հանգրվանը «Արթիկ» ՔԿ հիմնարկի ճաշարանն էր, ուր Արթուր Օսիկյանը ծանոթացել է դատապարտյալներին տրվող ճաշացանկին և հետաքրքրվել սննդի որակով՝ տեղում տալով հանձնարարականներ՝ կապված որակյալ սննդի ապահովման անխափան գործընթացի հետ:
Նա չի շրջանցել նաև ՔԿ հիմնարկի տարածքում գործող Սուրբ Գրիգոր Լուսավորիչ եկեղեցին՝ հատկապես կարևորելով դատապարտյալների և կալանավորված անձանց հոգևոր դաստիարակության հրամայականը:
Շրջայցի ավարտից հետո հիմնարկի դահլիճում տեղի է ունեցել ընդլայնված խորհրդակցություն ՔԿՀ վարչակազմի հետ, որի ընթացքում Արդարադատության նախարարության քրեակատարողական վարչության պետը լսել է հիմնարկի բոլոր ստորաբաժանումների ղեկավարներին, ականջալուր եղել բարձրացրած խնդիրներին ու ներկայացված առաջարկություններին և տվել համապատասխան հանձնարարականներ: