Ըստ ՁԻԱՀ-ի կանխարգելման հանրապետական կենտրոնի տվյալների՝ այս պահին ՀՀ-ում պաշտոնապես գրանցված է 1410 ՄԻԱՎ վարակակիր, իսկ ըստ ոչ պաշտոնական տվյալների՝ շուրջ 4 հազար: «Առաջին լրատվական»-ին կենտրոնից փոխանցեցին, որ իրենք կազմակերպում են կանխարգելիչ միջոցառումներ, սեմինարներ, որոնք ուղղված են մարդկանց սեռական կրթության մակարդակի բարձրացմանը՝ ՁԻԱՀ-ից խուափելու նպատակով:
ՁԻԱՀ-ով կարող են հիվանդանալ մի քանի ճանապարհով՝ սեռական, թմրամիջոցների ներարկման, հոմոսեքսուալ, ինչպես նաև՝ այն կարող է փոխանցվել հղի կնոջից երեխային և արյան միջոցով:
ԵՊԲՀ սեքսապաթոլոգիայի ամբիոնի վարիչ, սեքսապաթոլոգիայի կլինիկայի ղեկավար, դոցենտ Սևադա Հակոբյանն «Առաջին լրատվական»-ի հետ զրույցում ասաց, որ այս վիրուսով հիվանդ մարդիկ հասարակության լիարժեք անդամ են, և սխալ է նրանց մեջ խտրականություն դնելը. «Սակայն նրանք որևէ բուժհիմնարկում զննում անցնելիս պետք է տեղեկացնեն իրենց առողջական վիճակի մասին, որպեսզի պահպանվեն հիգիենայի կանոնները»
Մասնագետն ասաց նաև, որ հաճախ պտղին չվարակելու համար ՁԻԱՀ–ով վարակված կանանց հղիությունն ընդհատում են: Ինչ վերաբերում է ներերակային թմրամոլներին, ապա նրանք իրենց բուժումը ստանում են նույնիսկ պետական շրջանակներում:
ՀՀ-ում ՁԻԱՀ-ի տարածվածությունը, ըստ Սևադա Հակոբյանի, հիմնականում կապված է արտագնա աշխատանքի հետ. «Չպաշտպանված սեռական հարաբերության հետևանքով ՄԻԱՎ վարակը Հայաստան են բերում հիմնականում Ռուսաստանից և Ուկրաինայից: Նշեմ, որ արտասահմանում արդեն մշակվում է հատուկ ծրագիր, որով խրախուսվում է մեկ անձի հետ սեռական հարաբերությունը՝ հետագա բարդություններից խուսափելու համար»:
Վերջում նա հավելեց, որ արտաքին միջավայրում ՄԻԱՎ վիրուսը շատ անկայուն է և մեկանգամյա օգտագործման բժշկական պարագաների օգտագործման դեպքում վերանում է:
Հավելենք նաև, որ ՄԻԱՎ-ով վարակվածների 55,8 %-ն, ըստ ՁԻԱՀ-ի կանխարգելման հանրապետական կենտրոնի տվյալների, ախտորոշման պահին եղել է 25-39 տարիքային խմբում:
