Երեկ մենք տեղեկացրել էինք, որ Սիրիայի կառավարությունը հաստատել է 1963 թվից գործող արտակարգ դրության ռեժիմը վերացնելու օրինագիծը: Հիմա միայն մնում է, որ նախագահ Բաշար Ալ-Ասադը ստորագրի այն, որպեսզի օրենքն ուժի մեջ մտնի: Սակայն շատերը դա ձևական են համարում, քանի որ օրինագիծն առանց Ալ-Ասադի աջակցության չէր կարող հայտնվել կառավարության օրակարգում:
Սա, անշուշտ, ցուցարարների հաղթանակն է, քանի որ մի քանի շաբաթ երկրում տեղի ունեցող ցույցերի հիմնական պահանջներից մեկը արտակարգ դրության ռեժիմի վերացումն էր: Այդուհանդերձ, երեկ Սիրիայում արգելվել է ցանկացած զանգվածային միջոցառման անցկացումը, իսկ կեսգիշերին մոտ սեփական տանը ձերբակալվել է Հոմսում ամենաակտիվ ընդդիմադիրներից մեկը` Մահմուս Իսան: Այս մասին հաղորդում է Reuters գործակալությունը:
Իրավապաշտպանները նշել են, թե այս ձերբակալությունը ցույց է տալիս, որ ռեժիմը չի պատրաստվում գնալ իրական բարեփոխումների և շարունակելու է ռեպրեսիվ գործելաոճը:
Երեկ արտակարգ դրության վերացման որոշումը ողջունել է Ռուսաստանի արտաքին գործերի նախարարությունը, ինչի մասին հայտարարել է Ռուսաստանի արտաքին գործերի նախարար Սերգեյ Լավրովը. «Մենք, անշուշտ, այս որոշումը, որն ընդունվել է Սիրիայի իշխանությունների կողմից, դիտարկում ենք որպես քայլ, որը բխում է իրենց երկրի շահերից` կայունության, քաղաքացիական հաշտության ապահովման համար»,- նշել է նախարարը: Այս մասին հաղորդում է ITAR-TASS-ը:
