Բրիտանական ԶԼՄ-ների կողմից հանրահայտ մարդկանց հեռախոսային խոսակցությունների գաղտնալսումների մասին գործում հայտնաբերվել է 600 լրացուցիչ դրվագ: Ինչպես հայտնում է Reuters գործակալությունը, խոսքը Ռուպերտ Մերդոկի մեդիակորպորացիային պատկանող News of the World թերթի շուրջ սկանդալի նոր ալիքի մասին է:
Գործակալության փոխանցմամբ՝ «մասնավոր կյանքի իրավունքի խախտման» դեպքերի մասին տեղեկություններն իրավապահ մարմիններին է փոխանցել անանուն աղբյուրը, որը մոտ է 2011-ի հուլիսին սկանդալի պատճառով փակված թերթի ղեկավարությանը: Այդ մարդու մասին դեռևս հայտնի է միայն այն, որ նա գործով դատավարության ժամանակ հանդես կգա որպես վկա:
Սպասվում է, որ մարտի 18-ին կայանալիք լսումների ժամանակ, գաղտնալսման դեպքերի բազմակի ավելացման մասին տեղեկությունը պաշտոնական հաստատում կստանա:
Թերթի աշխատակիցերի կողմից իրավախախտումների մասին նոր մանրամասները թեժացրել են բրիտանական ԶԼՄ-ների վարքի կանոնների սահմանման մասին վարչապետ Դևիդ Քեմերոնի առաջարկած օրինագծի շուրջ քննարկումները:
Պետական վերահսկիչ մարմնի ստեղծման մասին Քեմերոնի առաջարկի վերաբերյալ քվեարկությունը տեղի կունենա Համայնքների պալատում՝ մարտի 18-ին:
