Մայիսի 5-ին կայանալիք Երևանի ավագանու ընտրություններին «Ժողովրդավարական հայրենիք» կուսակցությունը կողմ է մասնակցել իրական ընդդիմության միասնական ցուցակով: Գալիք ընտրություններում արհեստածին գործընթացների, ինչպես ԱԺ ընտրություններին եղավ, կուսակցությունը չի մասնակցի: «Առաջին լրատվական»-ի հետ զրույցում այս մասին ասաց «Ժողովրդավարական հայրենիք» կուսակցության առաջնորդ Պետրոս Մակեյանը՝ անդրադառնալով գալիք ընտրություններին:
Նա հաստատեց, որ իրենց դիրքորոշումը երեկ տեղի ունեցած քաղխորհրդի որոշմամբ հրապարակել են՝ ընդդիմությունը պետք է կարողանա հնարավորինս համախմբվել միասնական մեկ ցուցակով, որպեսզի մնացած ուժերը, որոնք փորձում են տարբեր հիմնավորումներով առանձին ցուցակով գնալ, մնան Հանրապետական կուսակցության կրծքանշան ունեցողների կարգավիճակում:
Պ. Մակեյանը տեղեկացրեց, որ «Ժառանգություն» կուսակցությունից իրենց ուղղված առաջարկ է եղել միանալու միասնական ցուցակին, հիմա այդ հարցը կուսակցության փոխնախագահը քննարկում է «Ժառանգության» հետ:
Հիշելով 2012թ. խորհրդարանական ընտրությունները, ինչպես նաև նախընտրական շրջանում ձևավորված ընտրությունները վերահսկող միասնական շտաբը՝ նա ասաց, որ դա հայտնի քաղաքական վերլուծության արդյունքն էր, որի հետևանքն էլ այն էր, որ նախագահական ընտրություններում շտաբը ձևավորած որոշ ուժեր հրաժարվեցին մասնակցել նախագահական ընտրություններին՝ ժողովրդին թողնելով անորոշության մեջ: Նա նաև ընդգծեց, որ այդ շտաբի ձևաչափին դեմ է եղել, քանի որ դրա կազմում էր ամենաշատ կեղծարարություն իրականացրած, ամենաշատ ընտրակաշառք բաժանող ուժը՝ ԲՀԿ-ն, որով էլ շտաբն ի սկզբանե անիմաստ էր, ձևական: Սա հաշվի առնելով՝ Պետրոս Մակեյանը չի ցանկանա, որ նմանատիպ շտաբ, միասնական ֆորմատ ձևավորվի, որովհետև անարդյունք է լինելու:
«Եթե կլինի շտաբ ժողովրդավարությամբ շահագրգիռ, իրական ուժերի մասնակցությամբ, կարծում եմ՝ նորմալ է լինելու: Մենք այս պահին որոշում ունենք մասնակցելու ընտրություններին ընդդիմության միասնական ցուցակով, որի առանցքն այս պահին Րաֆֆի Հովհաննիսյանն է, որովհետև փետրվարի 18-ը դա արձանագրեց: Հետագա գործընթացները ցույց կտան՝ կլինի՞ շտաբ, թե՞ ոչ, ո՞ր ուժերը կմտնեն այդ շտաբ իրենց մոտեցումներով: Բայց ես կրկնում եմ՝ ԱԺ ընտրությունների նախադեպը հաշվի առնելով՝ նման նախաձեռնությունն անիմաստ է, ձևական, իսկ մենք ձևական, արհեստածին պրոցեսների չենք մասնակցի: Դրանք մեզ համար խիստ կասկածելի երևույթներ են»,- տեսակետ հայտնեց «Ժողովրդավարական հայրենիք» կուսակցության նախագահը՝ հորդորելով սպասել հետագա զարգացումներին:
