ԱՄՆ-ը անհանգստացած է, որ Ռուսաստանը շարունակում է օգնություն ցուցաբերել Սիրիայի նախագահ Բաշար Ասադին՝ ուրբաթ օրը ճեպազրույցի ժամանակ հայտարարել է ԱՄՆ Պետդեպի պաշտոնական ներկայացուցիչ Վիկտորյա Նուլանդը: Այս մասին հայտնում է RIA Novosti-ն:
«Որքան երկար շարունակվի հակամարտությունը, այնքան ավելի շատ կզգացվի օտարերկրյա ազդեցությունը երկու կողմերի վրա: Մեզ ամենից շատ անհանգստացնում է ռեժիմին օտարերկրյա օգնության գերակշռումը: Խոսքը շոշափելի աջակցության մասին է՝ Իրանի, Հըզբոլլահի և Ռուսաստանի կողմից»,- ասել է նա:
Ավելի վաղ ՌԴ վարչապետ Դմիտրի Մեդվեդևը հայտարարել էր, որ Սիրիայի հարցում ՌԴ դիրքորոշումը «միանգամայն պրագմատիկ» է: Նրա խոսքով՝ Ռուսաստանը չի աջակցում ո´չ Ասադին, ո´չ էլ ընդդիմությանը, սակայն երկու կողմի հետ էլ կապի մեջ է:
Իր հերթին, Սիրիայի փոխվարչապետ Կադրի Ջամիլը հայտարարել էր, որ Սիրիայի կառավարությունը Ռուսաստանից զենք է ստանում մինչ քաղաքացիական հակամարտության սկսվելը կնքած գործարքների արդյունքում:
