Այսօր կրթության և գիտության նախարար Արմեն Աշոտյանը այցելեց Երևանի զբոսաշրջության, սպասարկման և սննդի արդյունաբերության հայ-հունական պետական քոլեջ:
Աշոտյանի այցի նպատակն էր մասնակցել քոլեջի համտեսի սրահի բացման արարողությանը: Քոլեջի ուսանողները նախարարին հյուրասիրեցին հայկական և հունական խոհանոցի խորտիկներով:
«Նախկինում ձևավորվել էր ավանդույթ, որ յուրաքանչյուր հայ ցանկանում էր ստանալ միայն բարձրագույն կրթություն, անկախ նրանից` պահանջված կլինի աշխատաշուկայում, թե ոչ: Հիմա երիտասարդները կատարում են ավելի պրագմատիկ ընտրություն և նախընտրում են ավարտել միջին մասնագիտական հաստատություն և ապահովված լինել աշխատանքով: Սա շատ լավ է»,- իր խոսքում ասաց Աշոտյանը:
Աշոտյանն այցելեց նաև քոլեջի նորակառույց ուսումնական հյուրանոց, որտեղ ուսանողները անցնում են իրենց պրակտիկան:
