Կոլումբիայի մայրաքաղաքի քաղաքապետ Գուստավո Պետրոն ՄԱԿ-ի կենտրոնակայանում հայտարարել է, որ Բոգոտայի իշխանությունները ծրագրում են քաղաքի տարածքում ստեղծել հատուկ հաստատություններ, որոնցում կթույլատրվի թմրամիջոցների, այդ թվում՝ կոկաինի ու հերոինի վերահսկվող քանակությամբ օգտագործումը:
Պատասխանելով լրագրողների հարցերին՝ Գուստավո Պետրոն քննադատության է ենթարկել երկրի իշխանությունների մեծ մասին, որոնք թմրանյութերից կախվածություն ունեցողներին հավասարեցնում են հանցագործների հետ:
«Բոգոտան իրականացնում է այլ քաղաքականություն: Մենք չենք կենտրոնանալու օգտագործողների վրա, նրանց չենք փակելու բանտերում ու նրանց նկատմամբ չենք հայտարարելու հետախուզում: Մենք նրանց վերաբերվելու ենք որպես քաղաքացիների, ու եթե նրանք անձամբ դա ցանկանան, կօգնենք բուժվել ծանր հիվանդությունից»- հայտարարել է նա:
Բոգոտայի քաղաքապետը վստահ է, որ նման մոտեցումը կկրճատի բռնության մակարդակը՝ հաղորդում է ITAR-TASS-ը:
Ընդ որում՝ նրան չի մտահոգում այն, որ ՄԱԿ-ը կոշտ դիրքորոշում ունի թմրամիջոցների կիրառման հարցում:
