Աշխարհում մարդու զարգացման վարկանիշային աղյուսակում Հայաստանը զբաղեցրել է 87-րդ հորիզոնականը: Այս մասին ասվում է «Հարավի մեծարում. Մարդկային առաջընթացը բազմազան աշխարհում» 2013թ. զեկույցում:
Զեկույցը պատրաստվել է ՄԱԿ Զարգացման ծրագրի կողմից և ներկայացնում է տվյալներ տարբերի երկրների բնակիչների կենսամակարդակի և սոցիալական պաշտպանվածության, առողջության ցուցանիշների, կրթության մակարդակի և մշակութային զարգացվածության, հանցավորության մակարդակի, շրջակա միջավայրի պահպանության, որոշումներ կայացնելիս մարդկանց մասնակցության մասին:
Զեկույցի համաձայն՝ Վրաստանը զբաղեցրել է վարկանիշային աղյուսակի 72-րդ հորիզոնականը, Ադրբեջանը՝ 78-րդ: Ռուսաստանը հայտնվել է 55-րդ հորիզոնականում:
Նորվեգիան, Ավստրալիան, ԱՄՆ-ը, Նիդերլանդները և Գերմանիան աշխարհում մարդու զարգացման ամենաբարձր մակարդակ ունեցող հինգ երկրներն են:
1990թ. սկսած՝ ՄԱԿ զարգացման ծրագիրն ամեն տարի հրապարակում է զեկույց՝ մարդու զարգացման մասին: Զեկույցը մշակվում է մի խումբ միջազգային անկախ փորձագետների կողմից, որոնք, բացի վերլուծական մշակումներից, աշխատանքում օգտագործում են տարբեր միջազգային միջկառավարական կազմակերպությունների և այլ միջազգային գործակալությունների վիճակագրական տվյալներ:
Այս տարվա զեկույցում ուշադրություն է դարձվում Հարավի երկրների զարգացման աննախադեպ աճին: Մասնավորապես, զեկույցի հեղինակները նշում են Չինաստանի և Հնդկաստանի տնտեսական կտրուկ աճը: Այսօր Հնդկաստանը և Չինաստանը պատկանում են զարգացման միջին մակարդակի երկրների թվին:
Զեկույցի համաձայն՝ ԱՄՆ-ը շարունակում է մնալ աշխարհի խոշորագույն տնտեսությունն ունեցող երկիրը: Փորձագետների կարծիքով՝ եթե ԱՄՆ տնտեսության վերականգնումը դանդաղի, ապա Եվրոպայի համար դժվար կլինի դուրս գալ ներկայիս տնտեսական և սոցիալական ծանր վիճակից:
