Էնդի Ռուբինը, որը Android բջջային օպերացիոն համակարգի մշակման թիմի ղեկավարն էր, վայր է դրել լիազորությունները: Google-ում նա կզբաղվի նոր նախագծերով, որոնք չեն հստակեցվում: Նրա տեղը կզբաղեցնի Սանդար Պիչայը, որը Chrome-ի և Google Apps-ի գծով ավագ փոխնախագահն է: Նա կհամատեղի նոր պաշտոնում աշխատանքը ընթացիկ նախագծերի հետ: Այս մասին հայտնում է Vesti-ն՝ հղում անելով Google-ի գլխավոր տնօրեն Լարի Փեյջին:
Փեյջը նշել է, որ ներկայում Android-ն ակտիվացված է 60 տարբեր արտադրողների կողմից թողարկված 750 միլիոն սարքի վրա, իսկ Google Play-ից ընդհանուր առմամբ ներբեռնվել է 25 միլիարդ հավելված:
Չի բացառվում, որ արդյունքում Android-ն ու Chrome OS «ամպային» պլատֆորմը կմիավորվեն: Այդ մասին սկսել էին խոսել, երբ Chromium նոր դիտարկիչի ելքային ծածկագրում հայտնաբերվել էր Google Now օգնականը: Իսկ այժմ հայտնի է դարձել, որ երկու օպերացիոն համակարգերը մեկ ընդհանուր ղեկավար ունեն:
