Գյուղնախարարության մթերումների վարչության պետ Գևորգ Ղազարյանը, պատասխանելով մեր հարցին, թե այս տարի քանի՞ տոկոսով են ավելացվելու խաղողի մթերումները, ասաց, որ դեռ շուտ է խաղողի մթերումների մասին խոսելը, քանի որ դեռ բերքի քանակի մասին որևէ բան չեն կարող ասել:
Մեր դիտարկմանը, որ գյուղացիների շրջանում մտավախություն կա, թե մթերումների ժամանակ առավելությունը տրվելու է ոչ թե անհատ գյուղացուն, այլ խոշոր հողատերերին, որոնք այս կամ այն պաշտոններն են զբաղեցնում, Գևորգ Ղազարյանը արձագանքեց. «Բերքի քանակից ելնելով՝ նոր կսկսենք այդ ուղղությամբ մոնիթորինգ անել:
Ինչ վերաբերում է ձեր նշած խտրականությանը՝ նման բան չկա: Նախ մենք համարյա թե խոշոր արտադրողներ չունենք: Իհարկե կան, բայց շատ քիչ են, օրինակ՝ Էռնեկյանները, նման խոշոր հողատարածքներ մեկ- երկուսն էլ կարող է լինեն: Իսկ հիմնականում վերամշակողները իրենց սեփական այգիները ունեն, որոնք էլի համեմատաբար խոշոր չափերի են: Բայց կրկնում եմ, որ այդպիսի խնդիր մինչ օրս չի եղել, որ խտրականության պատճառով գյուղացին տուժի, այս տարի ևս բացառություն չի լինի:
Այսինքն՝ այդ այգիների քանակը այնքան սահմանափակ է, որ պահանջարկը ամբողջությամբ հնարավոր չէ ծածկել»: