2016-ի տարեսկզբին Հրազդան քաղաքում քաղաքապետի ընտրություններ են: Նախատեսվում է, որ այս ընտրությունները նախորդի պես լարված են անցնելու, քանի որ այս անգամ էլ է առաջադրվելու «Քաղաքացիական պայմանագիր» կուսակցության անդամ, «Սասուն» ջոկատի հրամանատար Սասուն Միքայելյանը: Նախատեսվում է, որ ընտրապայքարը անցնելու է հենց գործող ՀՀԿ-ական քաղաքապետ Արամ Դանիելյանի և Սասուն Միքայելյանի միջև, և այդ փաստը բնավ չի անհանգստացնում գործող քաղաքապետին, որը անկախ այն փաստից, որ ընտրություններին դեռ ամիսներ կան՝ արդեն նախընտրական ակտիվության նշաններ է ցույց տալիս:
«Առաջին լրատվական»-ի հետ զրույցում Արամ Դանիելյանն ասաց, որ առաջադրման հետ կապված տարակուսանքներ չունի: Ամեն ինչ շատ հստակ է: «Ես նորմալ աշխատում եմ, սիրում եմ իմ աշխատանքը, սիրում եմ իմ կուսակցությունը: Երբ գա ժամանակը, ես կորոշեմ՝ առաջադրվե՞մ, թե՞ ոչ: Ես եմ որոշում՝ առաջադրվե՞մ, թե՞ ոչ»,- ասաց Դանիելյանը:
Մեր դիտարկմանը, թե Հանրապետակա՞նը չի որոշում՝ ինքն առաջադրվի, թե ոչ, քաղաքապետը նկատեց. «Կուսակցությունը ինքը հովանավորում է, ինքը աջակցում է, բայց ես եմ առաջադրվում: Ես առաջադրվում եմ, իսկ կուսակցությունն ինձ պադերժկա է անում, այսպես ասեմ»:
Ինչ վերաբերում է Սասուն Միքայելյանի առաջադրմանը, Դանիելյանը նկատեց, որ Հրազդանի ընտրություններին միշտ էլ մրցակցություն եղել է, միշտ էլ առաջադրվողներ, մրցակցողներ եղել են, և արդյունքը ցույց է տվել, թե ինչ է եղել: «Թող առաջադրվի՝ ինձ ինչ: Ինքն առաջադրվելու իրավունք ունի, բայց դա ինձ չի հուզում»,- ասաց գործող քաղաքապետը:
Ինչ վերաբերում է մարզպետի հետ հարաբերություններին և մամուլում շրջանառվող տեղեկություններին, թե Գուլոյանի նշանակումից հետո նրանց հարաբերությունները լարվել են, քանի որ իրեն է նախապես խոստացվել մարզպետի պաշտոնը, նա ասաց. «Գուլոյանի հետ իմ հարաբերությունները միշտ էլ լավ են եղել և մնալու են լավ, քանի որ ինքն իմ գործընկերն է, մենք միասին քաղաքապետ ենք աշխատել տարբեր քաղաքներում, երկար ճանապարհ ենք անցել և դեռ անցնելու ենք: Նա իմ վաղեմի ընկերն է, ու չի կարող ոչ մի խնդիր լինել»:
Գործող քաղաքապետը համաձայն չէ, որ ինքը իր պաշտոնավարման ընթացքում Հրազդանի համար բան չի արել: «Դրանք սուտ խոսակցություններ են: Կգաք Հրազդան՝ կտեսնեք իմ արածը: Էն մարդը, ով որ չի ուզում տեսնի իմ արածը, չի տեսնում: Մի բան, որ չուզենաս տեսնես, չես էլ տեսնի: Իսկ հրազդանցիք տեսնում են»,- եզրափակեց Դանիելյանը:
Իսկ Սասուն Միքայելյանը «Առաջին լրատվական»-ի հետ զրույցում ասաց, որ դեռ վաղ է խոսել իր առաջադրման մասին: Ժամանակը կգա՝ կորոշի: «Ես հո անլուրջ մարդ չեմ, որ ընտրություններից կես տարի առաջ հայտարարեմ՝ առաջադրվում եմ, թե չէ: Ժամանակը կգա՝ կորոշեմ»,- ասաց Միքայելյանը:
