ՀՀ ՊՆ վարչական համալիրում հուլիսի 30-ին տեղի է ունեցել պաշտպանության նախարար Սեյրան Օհանյանի հանդիպումը ակադեմիական դասընթացներն ավարտած շրջանավարտների հետ: ՀՀ պաշտպանության նախարարության տեղեկատվության և հասարակայնության հետ կապերի վարչությունից հայտնում են, որ հանդիպման ընթացքում պաշտպանական գերատեսչության ղեկավարն անկաշկանդ զրույց է ունեցել սպաների հետ, շնորհավորել է ծառայողական նոր պաշտոններ ստանձնելու կապակցությամբ:
Ողջունելով ՀՀ, ՌԴ, Չինաստանի, Բելառուսի, Ղազախստանի, Գերմանիայի և ԱՄՆ ակադեմիական դասընթացներն ավարտած շրջանավարտներին՝ Սեյրան Օհանյանը կարևորել է ռազմական բարձրագույն կրթության ստացած սպաների դերը ազգային բանակի մարտական պատրաստականության ամրապնդման գործում, հորդորել այսուհետ ևս չզլանալ և ծառայությունից ազատ ժամանակահատվածը տրամադրել ուսմանը:
Այնուհետև պաշտպանական գերատեսչության ղեկավարը շնորհավորել է բոլոր շրջանավարտներին դասընթացների ավարտի և նոր նշանակումների, առանձին դեպքերում էլ՝ հերթական զինվորական կոչումների շնորհման կապակցությամբ, մաղթել նրանց խաղաղ և արգասաբեր ծառայություն: Ընդգծելով, որ ակադեմիական դասընթացների շրջանավարտների մի մասը ռազմական կրթությունը ստացել է Հայաստանում և նշելով, որ տարեցտարի կավելանա մեր երկրում բարձագույն ռազմական կրթություն ստացած սպաների թիվը, Սեյրան Օհանյանը հույս է հայտնել, որ ծառայության նոր վայրերում գործնականում կիրառելո վ ակադեմիական դասընթացների ընթացքում ստացած գիտելիքները՝ սպաներն առավել կբարձրացնեն ՀՀ ԶՈւ մարտական պատրաստականության աստիճանը:
Հանդիպման ավարտին պաշտպանության նախարարն ակադեմիական դասընթացների շրջանավարտներին տվել է հստակ ցուցումներ և հանձնարարականներ, հորդորել անել առավելագույնը ծառայության ընթացքում ի հայտ եկող խոչընդոտները շտկելու և դրանք հետագայում բացառելու համար:
