Երևանի Ավան և Նոր Նորք վարչական շրջանների դատարանում՝ դատավոր Դավիթ Հարությունյանի նախագահությամբ, «Հարսնաքար» ռեստորանային համալիրի տարածքում անցյալ տարվա հունիսի 17-ի բռնարարքի գործով այսօրվա դատական նիստում հետազոտվել է իրեղեն ապացույց ճանաչված «մայկան» կամ «վերնաշապիկը»:
Տուժող, ռազմական բժիշկ Արտակ Բայադյանի հագուստը երկու վերոհիշյալ անվանումներով է հիշատակվում գործում, ինչը դատավարության մասնակիցների մոտ որոշակի կասկածների տեղիք էր տվել: Արտակ Բայադյանը, սակայն, հաստատել է, որ կարմիր զոլերով սպիտակ «մայկան» իրենն է և որ այն իր հագին է եղել դեպքի օրը:
Ամբաստանյալ Նորայր Հայրապետյանի պաշտպան Երեմ Սարգսյանը նկատեց, որ իր պաշտպանյալը ինքնակամ է ներկայացել ոստիկանություն և այդ պահի դրությամբ գործում նրա վերաբերյալ որևէ տվյալ չի եղել: Սակայն այդքանով հանդերձ՝ ըստ նրա, նույն օրը Ն.Հայրապետյանը ձերբակալվել է Վահե Ավետյանին ծանր մարմնական վնասվածք պատճառելու կասկածանքով՝ առանց որևէ ապացույցի: Մեղադրող Արթուր Դավթյանն առարկել է պաշտպանի դիտարկման դեմ՝ հայտարարելով, եթե տեղեկություններ չկային «ինչու էին ոստիկանները մի քանի օր գնում Ն.Հայրապետյանի տուն», ինչին պաշտպանը նորից առարկեց՝ «եթե անգամ օպերատիվ տեղեկատվություն կա, ապա այն պետք է առկա լինի գործում»:
Պաշտպանը հայտարարել է նաև, որ նախաքննական մարմնի կողմից կայացված որոշմամբ հաստատված է համարվել, որ վիճաբանությանը մասնակցել են նաև «այլ անհայտ անձինք», ուստի պարզ չէ, թե 6 ամբաստանյալնե՞րն են տուժողներին հասցրել տարբեր աստիճանի վնասվածքները, թե «ինքնությունը չպարզված այլ անձինք»:
Ամբաստանյալ Արման Բաղդասարյանի պաշտպան Միհրան Պողոսյանը նկատել է, որ թեև իր պաշտպանյալն ինքնակամ է ներկայացել ոստիկանություն, սակայն որպես ձերբակալության նպատակ նշվում է «փախուստը կանխելը»:
Ըստ ամբաստանյալ Գարիկ Մարգարյանի պաշտպան Մարինե Թովմասյանի, գործի նյութերում չի երևում իր պաշտպանյալի «անցումը» վկայից կասկածյալի: Ըստ պաշտպանի, իր պաշտպանյալը որպես վկա հարցաքննվելուց հետո մինչև ձերբակալվելը պահվել է ոստիկանությունում: Իսկ Մ.Պողոսյանն իր հերթին դատարանի ուշադրությունը հրավիրեց այն հանգամանքի վրա, որ հունիսի 19-ով թվագրված մի գրությամբ նշվում է, որ հունիսի 20-ին ձերբակալվել է ամբաստանյալ Արթուր Բաբլոյանը, ինչն, ըստ պաշտպանի, վկայում է նախաքննության մարմնի կողմից սույն գործով մեղադրյալների նկատմամբ ունեցած կանխակալ վերաբերմունքի մասին:
Ըստ նրա, դեպքի վայրի զննության արձանագրությունը կազմվել է օրենքի խախտմամբ՝ ընթերականերից մեկի 18 տարին լրացած չի եղել, ուստի արձանագրությունը չի կարող դրվել մեղադրանքի հիմքում:
Գործի գրավոր նյութերի հետազոտումը ավարտվեց, մարտի 15-ի դատական նիստում դատարանը կանցնի ամբաստանյալների հարցաքննությանը կամ քննության կառնի լրացուցիչ վկաներ հրավիրելու պաշտպանական կողմի միջնորդությունը:
‹‹Փաստինֆո»
