Պետական եկամուտների կոմիտեում այսօր հանդիպում էր կազմակերպվել, որի նպատակը փաստաթղթաշրջանառության նկատմամբ հսկողության գործընթացի կարգավորման վարչարարական և օրենսդրական խնդիրներին հասարակական կազմակերպություններին մասնակից դարձնելն էր:
«Փաստաթղթաշրջանառության կարգավորման խնդիրը նոր չէ. այդ ուղղությամբ անցած տարիներին նկատելի առաջընթաց ենք արձանագրել, պարզապես հարցն այսօր ավելի խիստ է դրված, քանի որ հարկային վարչարարության և ընթացակարգերի բարեփոխմանն ուղղված միջոցառումների արդյունքը մեզ արդեն հնարավորություն է տալիս համալիր հսկողության միջոցով ավելի արդյունավետ պայքարել առանց փաստաթղթի ապրանքաշրջանառության դեմ: Պայքարի ուղիները գտնված են. հանրապետության ամբողջ տարածքում պետք է խաղի մեկ` միասնական կանոն գործի, բոլորը պետք է աշխատեն փաստաթղթաշրջանառության հստակ սահմանված ընթացակարգերով»,- ասել է ՊԵԿ նախագահ Գագիկ Խաչատրյանը:
Անդրադառնալով տնտեսավարման հավասար պայմանների ապահովման խնդրին` նա նշել է, որ արդեն իսկ ներդրվել է «օրինապահ» հարկ վճարողների խրախուսման մեխանիզմ, ինչը հարկատուին հնարավորություն է տալիս ինքնուրույն գնահատել իր աշխատանքը. «Այս մոտեցումը նոր մշակույթ է և մեծ հնարավորություն բիզնեսի համար: Եթե մեր ուսումնասիրությունները ցույց տան, որ տվյալ բիզնեսն իսկապես մաքուր է աշխատում, ՊԵԿ աշխատակիցները նրան չեն անհանգստացնի: Շատ կարևոր է, որպեսզի բիզնեսի և կոմիտեի միջև փոխադարձ վստահության մթնոլորտ ձևավորվի. գործարարը պետք է համոզվի, որ մեր գործողությունները ոչ թե ժամանակավոր, այլ հետևողական բնույթ են կրում»:
ՊԵԿ նախագահի առաջին տեղակալ Արմեն Ալավերդյանի խոսքերով, ՀԿ-ների հետ հանդիպման նախաձեռնությունը ՊԵԿ-ինն է. «Նպատակն է հասարակության բոլոր կողմերին մոտեցնել խնդրին, ներկայացնել, որ երկրում ստվերային տնտեսությունը և առանց փաստաթղթերի աշխատելը նույն երևույթներն են, հետևաբար ցանկացած միջոցառում և գործողություն, որն ուղղված է այս խնդրի կարգավորմանը, հավասարազոր է ստվերի կրճատմանը»:
