Թուրքական Son dakika լրատվական կայքի փոխանցմամբ՝ քրդամետ «Ժողովուրդների դեմոկրատական» կուսակցության (ԺԴԿ) խմբակցության փոխնախագահներ Իդրիս Բալուքենն ու Փերվին Բուլդանը մամուլի ասուլիս են կազմակերպել Թուրքիայի խորհրդարանի շենքում։
Բուլդանը հայտարարել է, որ ԺԴԿ-ի բոլոր 80 պատգամավորները ստորագրել են պատգամավորական անձեռնմխելիության վերացման դիմումը, որը ներկայացվել է խորհրդարանի ղեկավարությանը:
«Մենք մեր խոսքի տերն ենք։ Մեր 80 պատգամավորները ստորագրել են անձեռնմխելիության վերացման հայտարարությունը, որը մենք ներկայացնում ենք մեջլիսի ղեկավարությանը։
Դրանում առկա է նաև խորհրդարանին ուղղված կոչ։ Թող վերացվի 550 պատգամավորների անձեռնմխելիությունը։ Կոչն առնչվում է նաև «Արդարություն և զարգացում» կուսակցությանը (ԱԶԿ) և «Ազգայնական շարժում» կուսակցությանը (ԱՇԿ)»,- ասել է նա։
Սրանից առաջ Թուրքիայի նախագահ Ռեջեփ Էրդողանը հայտարարել էր ԺԴԿ-ի պատգամավորներին անձեռնմխելիությունից զրկելու և այդ կուսակցությունը փակելու անհրաժեշտության մասին՝ ԺԴԿ-ն որակելով որպես «PKK-ի քաղաքական թև»։ ԺԴԿ համանախագահ Սելահաթթին Դեմիրթաշն իր հերթին հայտարարել էր, որ իրենք չեն վախենում պատգամավորական անձեռնմխելությունից զրկվելուց, քանի որ չեն գործել որևէ մեղք, և որ միակ «մեղքը» խորհրդարանական ընտրություններում քվեների 13 տոկոսը հավաքելն է։ Դեմիրթաշը կարևորել էր, որ պատգամավորական անձեռնմխելիության վերացումն առնչվի բոլոր պատգամավորներին։
