Սեպտեմբերի 13-ին Հայաստանի 23 համայնքներում տեղական ինքնակառավարման մարմինների ընտրություններ են, որոնցից երկուսում քաղաքապետ են ընտրում: Քաղաքապետ են ընտրում Իջևանում և Մարալիկում: Երկու քաղաքում էլ, ըստ էության, առաջադրվելու են գործող քաղաքապետները: Իջևանում կրկին առաջադրվելու է նախկին ԲՀԿ-ական, ներկայումս անկուսակցական Վարդան Ղալումյանը: Նա ԲՀԿ-ից դուրս եկավ փետրվարյան հայտնի զարգացումներից հետո, մինչդեռ քաղաքապետի պաշտոնում նախորդ ընտրություններում ընտրվել էր ԲՀԿ-ի աջակցությամբ և մեծ սկանդալով, քանի որ հաղթել էր ՀՀԿ-ական թեկնածուին:
Ղալումյանը վերջերս լրատվամիջոցներից մեկի հետ զրույցում հաստատել էր, որ առաջադրվելու է, քանի որ վստահ է, որ ընտրվելու է: «Առաջին լրատվական»-ի հետ զրույցում, սակայն, Ղալումյանը չցանկացավ պատասխանել մեր հարցերին, որով ցանկանում էինք հատկապես պարզել՝ հնարավոր է, որ առաջիկայում համալրի իշխող կուսակցության շարքերը՝ հաղթանակ ապահովելու համար: Նա հայտարարեց, որ շատ զբաղված է, ժամանակ չունի ու ամբողջ օրը այդպես էլ չպատասխանեց մեր զանգերին:
Մարալիկում նույն պատկերն է: Գործող ՀՀԿ-ական Արտակ Գևորգյանը արդեն 4-րդ անգամ պատրաստվում է առաջադրվել: Նա էլ, ըստ էության, մրցակից չունի:
Ընդ որում՝ նշենք, որ սեպտեմբերի 13-ին սպասվող ՏԻՄ ընտրություններում, համայնքներից և ոչ մեկում ընդդիմությունը թեկնածու չի առաջադրել:
«Ժողովրդավարական հայրենիք» կուսակցության նախագահ Պետրոս Մակեյանը, ով նաև ծնունդով է Մարալիկից, «Առաջին լրատվական»-ի հետ զրույցում նշեց, որ ո՛չ իրեն, ո՛չ էլ կուսակցությունից որևէ մեկին չեն առաջադրելու, քանի որ «Հայաստանում ընտրական համակարգ ընդհանրապես գոյություն չունի, իսկ քաղաքապետների ու համայնքապետերի ընտրությունները դարձել են տեղի փոքրիկ ֆեոդալիկների նշանակում՝ ընտրության քողի տակ»: «Իմաստազուրկ է նման իմիտացիայի մասնակցելը: Մեծ հաշվով պետք է գլուխը պոկվի, փոխվի, որից հետո նոր հնարավոր կլինի ընդդիմադիր ուժերի մասնակցությունը ՏԻՄ ընտրություններին»,- նկատեց Մակեյանը:
Մեր դիտարկմանը, թե ինքնահոսի թողնելով և ՏԻՄ ընտրություններին ընդհանրապես չմասնակցելով՝ արդյոք ընդդիմությունը չի լեգիտիմացնում իշխանական թեկնածուի ընտրությունը, Մակեյանը նկատեց. «Այն փաստը, որ իշխանական թեկնածուն միշտ իր թեկնածուին է դնում և ապահովում նրա հաղթանակը, դա խոսում է հենց իշխանության խայտառակության մասին: Ընդդիմությունն այսօր մեկ ճանապարհ ունի՝ կա՛մ պետք է ուժի միջոցով իշխանությանը պարտադրի նորմալ ընտրություն անցկացնել, որը հնարավոր չէ, կա՛մ էլ պետք է հեռացնել իշխանությանը, որից հետո նոր հնարավոր կլինի նորմալ ընտրություն կազմակերպել»,- ասաց Մակեյանը՝ հավելելով, որ հակառակը՝ եթե այս իրավիճակում ընդդիմությունը մասնակցի ընտրություններին, ապա կլեգիտիմացնի ընտրությունները: «Պետք է բոյկոտել, քանի դեռ նորմալ ընտրություններ չեն կազմակերպվում: Պետք է թողնել, որ իրենց թատերական ներկայացումը իրենք բեմադրեն ու խաղան»,- ասաց Մակեյանը:
Մեր զրուցակիցը ևս հաստատեց, որ գործող քաղաքապետը միայնակ է մասնակցելու ընտրություններին: Մակեյանը նշեց, որ ՀԱԿ-ն էր պատրաստվում Հարություն Ուռուտյանի որդուն առաջադրել, սակայն վերջինս հրաժարվել է մասնակցել Մարալիկի քաղաքապետի ընտրություններին: «Արդյունքում մնացել է միայն ՀՀԿ խունտայի ներկայացուցիչ գործող քաղաքապետը»: