ԱԺ Ժառանգություն խմբակցության ղեկավար Ստեփան Սաֆարյանն այսօր հայտարարեց, թե գնալով ուժեղանում են Հայաստանի արտաքին միջավայրի ազդակները: Ավելին, ըստ նրա, որքան մոտենան ընտրությունները, այդքան այդ ազդակները զգալի են դառնալու:
Նա թվարկեց ՀՀ վերաբերյալ միջազգային տարբեր կազմակերպությունների գնահատականներն ու զեկույցները: Նրա խոսքերով, ՀՀ-ում շահեր ունեցող պետությունները հիմա իրար են կապել ներքին ու արտաքին խնդիրները, եւ հիմա դրանք «ապասառեցնում են»:
«Ինքներդ եք նկատել, որ վերջին շրջանում մի քանի զեկույց է հրապարակվել: Դրանցից մեկը ԵԽԽՎ համազեկուցողների զեկույցն էր, որտեղ ասվում է, որ չկատարված պարտավորությունները և Մարտի 1-ի չբացահայտումն ուղղակիորեն կապակցվել են սոցիալական բունտի սպառնալիքի հետ: Այսինքն` ներքին մի կոնֆլիկտ ուղղակի կապվել է այդ խնդրի հետ:
Դրան նախորդել են Միացյալ թագավորության, ԱՄՆ պետդեպի զեկույցները` Հայաստանում մարդու իրավունքների իրավիճակի հետ կապված: Ակնհայտ է, որ պետդեպի զեկույցում, բավականին շատ տարօրինակ կոնտեքստում խցկված էր Ղարաբաղի ու ադրբեջանական հողերի «օկուպացիայի» սյուժեն: Ես սրանք ընդգծում եմ, ուղղակի ցույց տալու, թե Հայաստանում` շահեր ունեցող որ պետության, որ ներքին խնդիրը, որ արտաքին կոնֆլիկտի հետ է կապակցված»,- նշեց Սաֆարյանը:
