Մալիում խաղաղապահ առաքելության տեղակայման հարցի շուրջ ՄԱԿ-ի Անվտանգության խորհրդի քվեարկությունը տեղի կունենա 2013-ի ապրիլին, իսկ առաքելությունը երկիրը կուղարկվի նույն թվականի հունիսին: Այս մասին հայտնել է Ֆրանսիայի արտգործնախարար Լորան Ֆաբիուսը,- փոխանցում է Associated Press-ը:
Ինչպես հայտնել է Ֆաբիուսը, Մալիում ՄԱԿ-ի խաղաղապահական զորակազմը կընդգրկի մինչև 10 հազար մարդ՝ իր մեջ ներառելով արդեն իսկ Մալիում գտնվող Աֆրիկյան միջազգային առաքելության 6300 ծառայողներին:
Հիշեցնենք, որ իրադրությունը Մալիում սրվել էր անցած տարեվերջին, երբ իսլամիստներն իրենց վերահսկողության տակ վերցրին երկրի հյուսիսը և հարձակման մի քանի փորձ ձեռնարկեցին կառավարական ուժերի դեմ: Ֆրանսիական ստորաբաժանումները աֆրիկյան երկիր էին ժամանել 2013-ի հունվար սկզբին, այն բանից հետո, երբ ՄԱԿ ԱԽ-ն արտոնեց միջազգային զորակազմի մուտքը: Շուտով Մալիում ռազմական դրություն մտցվեց:
Արդեն հունվարի 24-ին ֆրանսիական բանակը իր տիրապետության տակ էր առել Գաո քաղաքը, որը համարվում էր արմատական իսլամիստների հիմնական պատվարը և նրանց ոչ պաշտոնական մայրաքաղաքը: 6 օր անց զորքերին հաջողվեց վերահսկողություն սահմանել Կիդալ քաղաքի նկատմամբ: Այն արմատականների վերջին ապաստանն էր:
