Ֆրանսիայի իշխանությունները բոլոր ուժերը կենտրոնացրել են ձյան մաքրման աշխատանքների վրա՝ աշխատանքներում ներգրավելով նաև զինծառայողներին,- հայտնում է ITAR-TASS-ը:
Ծանր ռազմական տեխնիկա է ուղղվել Շերբուր (Մանշ դեպարտամենտ)՝ ձյունից ազատելու ազգային մայրուղին, որը միավորում է Նորմանդիան Փարիզին: Ավելի քան 1 օր տվյալ մայրուղին ամբողջությամբ փակ է եղել տրանսպորտի բոլոր տեսակների համար:
Ֆրանսիայի հյուսիս-արևմուտքում տրանսպորտային կոլապսը շատերին է անակնկալի բերել: Իշխանությունների տեղեկություններով՝ շուրջ 2000 ավտոմոբիլիստներ են արգելափակվել անակնկալ ձյան հետևանքով:
Երեկ Փարիզի օդանավակայաններում չվերթների շուրջ 25 տոկոսը չեղյալ է հայտարարվել, երկաթուղային հաղորդակցությունը ամբողջությամբ դադարել էր «Եվրոսթար» միջազգային գծում, որը միավորում է Փարիզը, Բրյուսելն ու Լոնդոնը:
Հիդրոօդերևութաբանները եղանակի լավացում են կանխատեսում օրվա երկրորդ կեսին, սակայն իրավիճակը բարդանում է նրանով, որ սպասվում է ջերմաստիճանի կտրուկ նվազում:
«Մետեո Ֆրանս»-ի տեղեկություններով՝ սեզոնային նորմայից շեղումները գիշերը կկազմեն 14 աստիճան՝ ըստ Ցելսիուսի:
Ձյան տեղումների հետևանքով առանց էլեկտրաէներգիայի է մնացել շուրջ 80 հազար տնային տնտեսություն Ֆրանսիայի հյուսիս-արևմուտքում:
