ՄԱԿ-ում հաշվի են առել Մեծ Բրիտանիայի վարչապետ Դևիդ Քեմերոնի՝ Սիրիայի ընդդիմությանը զենք մատակարաարելու պատրաստակամության մասին հայտարարությունները և հիշեցրել են, որ հակամարուության հետագա զինումն օգուտ չի բերի,- փոխանցում է ITAR-TASS-ը:
«Այս հարցում գլխավոր քարտուղարի դիրքորոշումը լավ հայտնի է. հակամարտության հետագա զինման ցանկացած փորձ օգուտ չի բերի ճգնաժամից դուրս գալու ելքի որոնմանն ուղղված ջանքերին»,- հայտարարել է ՄԱԿ-ի գլխավոր քարտուղարի պաշտոնական երկայացուցիչ Մարտին Նեսիրկեն:
Երեքշաբթի օրը բրիտանական խորհրդարանում Դևիդ Քեմերոնն ասել է, որ Լոնդոնը կարող է Սիրիա զենքի մատակարարման ԵՄ-ի էմբարգոն երկարաձգելու հարցի քննարկման ժամանակ օգտվել վետոյի իր իրավունքից: «Հակառակ դեպքում՝ բացառված չէ, որ մենք ստիպված լինենք մեր ձևով վարվել»,- ասել է նա:
Ավելի վաղ Լոնդոնը հայտարարել էր Սիրիայի ընդդիմությանը զրահամեքենաներ և զրահաբաճկոններ տրամադրելու մտադրության մասին: ԱԳՆ ղեկավար Ուիլյամ Հեյգի խոսքով՝ դա քաղաքացիական բնակչության պաշտպանության համար է: Ընդդիմադիրներին զենք մատակարարում է նաև ԱՄՆ-ը, իսկ Սաուդյան Արաբիան և Կատարը բացահայտ կերպով նրանց աջակցում են զինամթերքով:
