Հուլիսի 27-ին՝ ժամը 02:42-ին, ահազանգ է ստացվել, որ Երևանի Մոնթե Մելքոնյան պողոտայում տեղի է ունեցել ավտոպատահար. ավտոմեքենան դուրս է եկել ճանապարհի երթևեկելի հատվածից և շրջվել ձորակը:
Դեպքի վայր է մեկնել ՀՆՓԱԻ կենտրոնի փրկարարական ջոկատը և մեկ մարտական հաշվարկ:
Ըստ Տարածքային կառավարման և արտակարգ իրավիճակների նախարարության պաշտոնական կայքի՝ պարզվել է, որ դեռևս չբացահայտված հանգամանքներում «Մազդա 6» մակնիշի 23 PO 001 պետհամարանիշով ավտոմեքենան դուրս է եկել ճանապարհի երթևեկելի հատվածից և շրջվել ձորը (մոտ 30 մ):
Մինչ փրկարարների կանչի վայր հասնելը՝ վարորդը՝ 1979 թ. ծնված Կ. Վ.-ը, ինքնուրույն դուրս է եկել ավտոմեքենայից: Փրկարարները վերջինիս պատգարակով դուրս են բերել ձորակից և մոտեցրել շտապօգնության ավտոմեքենային: Տուժածը հոսպիտալացվել է «Արմենիա» ՀԲԿ, որտեղ բժիշկները առողջական վիճակը գնահատել են ծայրահեղ ծանր:
