«Ժողովուրդ»-ը տեղեկացավ, որ Գեղարքունիքի մարզի Սևան քաղաքի գրեթե բոլոր խանութների սեփականատերերը պատրաստվում են մեծ բողոքի ակցիայի: Վերջիններս անգամ որոշել են փակել Սևանի ճանապարհը: Բանն այն է, որ այս օրերին ՊԵԿ-ը կտրուկ վերաբերմունք է դրսևորում մանր ու միջին գործարարների նկատմամբ՝ ստիպելով մեծացնել հարկային պարտավորությունները: ՊԵԿ մամլո ծառայության ղեկավար Նելլի Մանուչարյանը, «Ժողովուրղ»-ի հարցին ի պատասխան, ասաց. «Սևանի տարածքային հարկային տեսչությունում, ինչպես և բոլոր մյուս տարածքային հարկային մարմիններում, ռիսկերի բացահայտման նպատակով կատարվող վերլուծությունների արդյունքում առանձնացվում են այն հարկ վճարողները, որոնք փոքր շրջանառություններ են ցույց տալիս: Ինչ վերաբերում է դժգոհություններին, ապա անհրաժեշտ ենք համարում հայտնել, որ ՊԵԿ-ը պատրաստակամություն է հայտնում ցանկացած կոնկրետ դեպքի վերաբերյալ հանգամանալից պարզաբանում ներկայացնել»:
Թերթը զրուցեց նաև Սևանի քաղաքապետ Ռուդիկ Ղուկասյանի հետ, որը նշեց. «Ինձ մոտ էլ են եկել մի քանի հոգի, մեր հարկայինի պետն օրենքով աշխատող մարդ է, ինքն օրենքը չի խախտում, դա հաստատ եմ ասում»: Դե իհարկե, քաղաքապետը ո՞նց կարող է հակառակվել ՊԵԿ-ին:
