Ռուս գործարար Գերման Ստերլիգովը ադրբեջանական և մասամբ ռուսական ԶԼՄ-ներում Ղարաբաղ իր տեղափոխվելու վերաբերյալ զրպարտչական նյութերը մեկնաբանել է VKontakte-ի իր էջում:
«Ադրբեջանական և ռուսական մամուլի մի մասը մի ամբողջ շաբաթ զրպարտում էր ինձ, որ ես, իբր, «փախել եմ Լեռնային Ղարաբաղ»՝ թաքնվելով Ռուսաստանի ոստիկանությունից: Ստորանալու և ապացուցելու փոխարեն, որ դա սուտ է, ես որոշեցի զրպարտությունը ցրել ամենապարզ միջոցով՝ մի քանի օրով վերադառնալ Ռուսաստան, որ բոլոր զրպարտիչները լռեն»,- գրել է Ստերլիգովը:
Նա նաև նշել է, որ Մոսկվայում 3 օր լինելուց հետո Ռուսաստանի իրավապահ մարմիններն իր հանդեպ ոչ մի հետաքրքրություն չեն ցուցաբերել:
«Թեման համարում եմ սպառված և վերադառնում եմ Լեռնային Ղարաբաղ՝ իմ կնոջ ու երեխաների մոտ»,- ասել է գործարարը:
Իր հերթին, «Տրեշյով և գործընկերներ» փաստաբանական ընկերության ղեկավար Ալեքսանդր Տրեշյովը Komersant FM-ին տված հարցազրույցում մեկնաբանելով Ադրբեջանում Գերման Ստերլիգովի դեմ քրեական գործի հարուցումը՝ վստահություն է հայտնել, որ գործը ոչ մի զարգացում չի ստանա:
«Դա քաղաքականացված գործ է, որը ոչ մի հեռանկար չունի: ՄԱԿ-ի բոլոր կոնվենցիաները, եվրոպականներն ասում են, որ մարդը տեղաշարժվելու ազատության իրավունք ունի: Գերման Ստերլիգովը ոչինչ չի խախտել. նա գաղտնի չի անցնել անտառնելով՝ խախտելով օրենսդրությունների միգրացիոն տեսակները, առավել ևս՝ նա չի առաջարկել ոչ մի իշխանություն տապալել, նա միայն ասել է, որ այստեղ նրան դուր է գալիս: Նա գտնվում է տարածքում, որն ունի բոլոր նշանները երկրի, ինչպես նրանց թվում է, ուստի ոչինչ չի լինի: Օտար պետությունների ոչ մի իշխանություն չի կարող այնտեղ հատուկ գործողություններ իրականացնել՝ նրան ինչ-որ կերպ իրենց տարածք հասցնելու համար, և փորձել իրագործել այդ քրեական գործը»,- նշել է Տրեշյովը:
Ավելի վաղ հաղորդվում էր, որ Ադրբեջանի գլխավոր դատախազությունը Ստերլիգովի դեմ քրեական գործ է հարուցել երկու հոդվածով:
Հուլիսի 6-ին Ստերլիգովը լքել է Ռուսաստանը և մեկնել Լեռնային Ղարաբաղ:
Ավելի վաղ Ադրբեջանի ԱԳՆ-ն Ստերլիգովին ներառել էր անցանկալի անձանց ցուցակում: