Երեկ ԱՄՆ Սպիտակ տան ներկայացուցիչ Ջեյ Քարնին հրապարակել է Բարաք և Միշել Օբամաների ներկայացրած՝ 2010 թ. հարկային հայտարարագիրը, որից պարզ է դարձել, որ անցած տարի ԱՄՆ նախագահի ընտանիքը վաստակել է 1.7 մլն դոլար, ինչը 3 անգամ պակաս է, քան 2009-ին: Այս մասին հաղորդում է Associated Press գործակալությունը:
«Նախագահն ու առաջին տիկինը ներկայացրել են հարկային համատեղ հայտարարագիր և հայտնել, որ 2010 թ. իրենց եկամուտը կազմել է 1.728 մլն դոլար: Դրա մեծ մասը նախագահի գրքի վաճառքից է: Օբամա ընտանիքը վճարել է դաշնային եկամտահարկ` 453 հազար դոլարի չափով»,- նշվում է Քարնիի հայտարարության մեջ:
ԱՄՆ նախագահի ընտանիքը նաև տեղեկացրել է, որ ավելի քան 240 հազար դոլար է փոխանցել 36 տարբեր բարեգործական կազմակերպությունների: Ամենամեծ փոխանցումը եղել է Fisher House Foundation-ին` 131 հազար դոլար, որը զբաղվում է զինվորականներին աջակցության ծրագրերով:
Տեղեկացնենք, որ նախորդ տարի ԱՄՆ նախագահի ընտանիքը վաստակել էր 5.5 մլն դոլար, որից 1.7 մլն-ը վճարվել էր պետությանը: ԱՄՆ նախագահի աշխատավարձը 400 հազար դոլար է: