Ըստ թուրքական Haberler.com կայքի՝ Հունաստանի կրթության նախարարությունը տնտեսական ճգնաժամի և առավել որակյալ կրթություն տալու պատճառաբանությամբ վճռել է փակել Թուրքիային սահմանամերձ հատվածում (Արևմտյան Թրակիա) գտնվող 35 թուրքական դպրոցները:
Թուրքական կողմը նշում է, որ 1933 թվականին Արևմտյան Թրակիայում գոյություն ուներ 877 թուրքական դպրոց: Սակայն տարիների ընթացքում դրանց թիվը նվազեցվեց մինչև 57-ի: Այժմ էլ հունական կողմը ցանկանում է թողնել միայն 22 դպրոց:
Թուրքական կողմը նշում է, որ այդ դպրոցներն իր համար մզկիթների չափ կարևորություն ունեն:
Հիշեցնենք, որ օրեր առաջ թուրքական դատարանը վճռեց, թե Պոլսի հունական պատրիարքարանը աշակերտների սակավության պատճառով պետք է փակի հունական դպրոցները: Թեև այդ վճիռը վերաբերում էր կոնկրետ 2 հունական դպրոցների, այնուամենայնիվ, Թուրքիայի կրթության նախարարության տվյալներով, Ստամբուլում կան 13 հունական դպրոցներ, որոնցում նույնպես բացակայում է լիարժեք կրթական գործընթացը:
