Սիրիայի ներքին գործերի նախարարությունը Սիրիայում տեղի ունեցող իրադարձություններն անվանեց «ռազմական խռովություն», որը կազմակերպվել է ծայրահեղ իսլամականների` սալաֆիների կողմից: Այս մասին նախօրեին հաղորդել է սիրիական SANA գործակալությունը: Նախարարությունից հայտնել են, որ կձեռնարկվեն ամենախիստ միջոցները` երկրում անվտանգությունն ու կայունությունը վերականգնելու համար, իսկ ահաբեկիչները, որտեղ էլ որ նրանք գտնվեն, կհանձնվեն արդարադատությանը` խռովությանը վերջ դնելու համար:
«Վերջին իրադարձությունները որոշ նահանգներում, հատկապես Հոմսում և Բանիասում, որտեղ զինվորականներ, ոստիկաններ ու քաղաքացիական անձինք են սպանվել, իսկ հասարակական և մասնավոր սեփականությանը վնաս է հասցվել, ցույց են տալիս, որ խոսքը սալաֆիների ռազմական խռովության մասին է: Մենք թույլ չենք տա այդ կազմակերպությունների ահաբեկչական գործունեությունը, որոնք սպառնում են քաղաքացիների անվտանգությանը և վախեցնում նրանց»,- ասված ՆԳՆ հայտարարության մեջ:
Մինչդեռ երեկ շարունակվել են բախումները իրավապահների և ցուցարարների միջև: Reuters գործակալության փոխանցմամբ, երկուշաբթի լույս երեքշբթի գիշերը սիրիական Հոմս քաղաքում անվտանգության ուժերը կրակ են բացել հարյուրավոր ցուցարարների վրա: Մինչ կրակ բացելը իրավապահները խնդրել են ցուցարարներին հեռանալ, սակայն վերջիններս հրաժարվել են: Երեկ նաև հայտնի է դարձել, որ Հոմսի բանտում գնդակահարվել է առնվազն 8 մարդ:
Իրավապաշտպանները նշում են, որ երեկ սպանվել է առնվազն 17 ցուցարար: Այս մասին հաղորդել է Al-Jazeera հեռուստաալիքը: Դեպքերը տեղի են ունեցել Հոմս քաղաքում, որտեղ հավաքվել է մինչև 20 հազար մարդ: CNN հեռուստաալիքը հաղորդում է, որ վերջին երկու օրվա ընթացքում առնվազն 24 մարդ է զոհվել Սիրիայում տեղի ունեցող բախումների ժամանակ:
