Բրիտանիայի էներգետիկայի նախկին նախարար Քրիս Հյուն և նրա նախկին կինը՝ Վիկի Փրայսը, արդարադատությանը խոչընդոտելու համար դատապարտվել են ութ ամսվա ազատազրկման: Նրանք մեղավոր են երթևեկության կանոնները խախտելու համար:
Ինչպես տեղեկացնում են բրիտանական ԶԼՄ-ները, նախկին նախարարը և նրա նախկին կինը բանտում կանցկացնեն այս ժամկետի կեսը՝ չորս ամիսը, այնուհետև պայմանական ազատ կարձակվեն:
Քրեական գործ հարուցելու պատճառն այն է, որ 10 տարի առաջ կեղծ տեղեկատվություն տալու համար Հյուն խուսափել է վարորդական իրավունքից զրկվելուց: Փրայսը սկզբում կեղծ ցուցմունք է տվել, այնուհետև ամուսնուց բաժանվելուց հետո պատմել է այդ մասին:
Քրիս Հյուն 2010-2012թթ.-ին զբաղեցրել է էներգետիկայի նախարարի պաշտոնը և Լիբերալ դեմոկրատական կուսակցության առաջնորդներից մեկն է եղել: Վիկի Փրայսը 2007-2010թթ.-ներին ղեկավարել է Բրիտանիայի կառավարության տնտեսական խորհրդատուների խումբը:
Անցած տարվա փետրվարին Հյուն պաշտոնաթող է եղել, որից հետո դատախազությունը նրա դեմ մեղադրանք է ներկայացրել՝ նրա նախկին կնոջ հայտարարությունների հիման վրա: Կնոջ խոսքերով՝ 2003թ.-ին Հյուն մեքենան վարելիս հերթական անգամ խախտել է երթևեկության կանոնները: Քանի որ նա կարող էր զրկվել վարորդական իրավունքից, խնդրել է Փրայսին հայտարարել, որ մեքենան այդ ժամանակ ինքն է վարել:
