«Առաջին լրատվական»-ի տեղեկություններով՝ իշխանությունը վերջնական որոշում է կայացրել արդարադատության նոր նախարարի հարցում, և ընտրությունը կանգ է առել ՀՀԿ-ական պատգամավոր, ԱԺ պաշտպանության, ազգային անվտանգության և ներքին գործերի մշտական հանձնաժողովի նախագահ Կորյուն Նահապետյանի վրա:
Ի դեպ, նրա անունը շրջանառվում էր նաև Հովիկ Աբրահամյանի կառավարությունը ձևավորելիս, սակայն այդ ժամանակ Հովիկ Աբրահամյանի ձայնը վճռորոշ եղավ, և պաշտոնը զբաղեցրեց Հովհաննես Մանուկյանը:
Մեզ հասած տեղեկություններով՝ Կորյուն Նահապետյանի Արդարադատության նախարարի պաշտոնում հաստատելու համար ամենամեծ շահագրգռությունը հանդես է բերում ՀՀԿ-ական Սամվել Ալեքսանյանը, որի հետ Նահապետյանը բարեկամական կապերի մեջ է: Կորյուն Նահապետյանը Սամվել Ալեքսանյանի փեսան է՝ քրոջ ամուսինը:
Արդարադատության նախարարի հավանական թեկնածուների շարքում շրջանառվում է նաև ՀՀԿ-ական պատգամավոր Արփինե Հովհաննիսյանի անունը, սակայն նա արդեն իսկ վերին օղակներում հայտարարել է, որ ինքը դեռևս պատրաստ չէ «մտնելու նման ծանր բեռի տակ»:
Հիշեցնենք, որ արդարադատության նախարար Հովհաննես Մանուկյանն աշխատանքից ազատվեց նախորդ շաբաթ, սեփական դիմումի համաձայն: Թեև մամուլում հրապարակումներ եղան, որ արձակուրդում գտնվող և Հունաստանում հանգստացող նախարարը չի իմացել իր ազատման մասին:
Ըստ parliament.am կայքի Կորյուն Նահապետյանը ծնվել է 1971թ. հուլիսի 23-ին Երեւանում:
1994թ. գերազանցությամբ ավարտել է ԵՊՀ իրավաբանական ֆակուլտետը, 2002թ.` ԵՊՀ ասպիրանտուրան, 2007թ.` ԱՄՆ-ի Թաֆթս համալսարանի Ֆլեթչերի իրավունքի եւ դիվանագիտության դպրոցը: Իրավաբան:
Մասնակցել է մի շարք դասընթացների հետեւյալ թեմաներով` «Միջազգային առեւտուր եւ ներդրումներ» (1996թ., Հունաստանի ազգային էկոնոմիկայի նախարարություն, Պիրեյ, Հունաստան), «Դատախազների ուսուցում» (1999թ., Ամերիկյան իրավաբանների ընկերակցություն, Կենտրոնական եւ Արեւելյան Եվրոպայի իրավական նախաձեռնություն, Ֆրանկլին Պիրս իրավաբանական կենտրոն, Կոնկորդ, ԱՄՆ), «Մարդու իրավունքների պաշտպանության եվրոպական համակարգ» (2000թ., Ուկրաինայի իրավական հիմնադրամ, Կիեւ, Ուկրաինա), «Ներքին վերահսկողություն» (2001թ., ԱՄՆ արդարադատության դեպարտամենտ, Հետաքննությունների դաշնային բյուրո, Բուդապեշտ, Հունգարիա), «Ղեկավարումը բարգավաճ Հայաստանի իրավական բարեփոխումներում» (2003թ., Կոնֆլիկտների կառավարման խումբ, Քեմբրիջ, ԱՄՆ):
1994-1998թթ. աշխատել է ՀՀ Նախագահի աշխատակազմի իրավաբանական բաժնում` որպես առաջին կարգի մասնագետ, այնուհետեւ` առաջատար մասնագետ: 1999-2006թթ. աշխատել է ՀՀ գլխավոր դատախազությունում` որպես գիտաուսումնական կենտրոնի գիտաշխատող, ապա` ՀՀ գլխավոր դատախազի ավագ օգնական, այնուհետեւ` իրավական եւ կառուցվածքային բարեփոխումների բաժնի պետ: 2006-2008թթ. եղել է ՀՀ դատական դեպարտամենտի ղեկավարի առաջին տեղակալ, դատարանների նախագահների խորհրդի քարտուղար:
2003 թվականից Ռուս-հայկական (Սլավոնական) համալսարանի միջազգային եւ եվրոպական իրավունքի ամբիոնի դասախոս է, իսկ 2011 թվականից` նաեւ Հայաստանում ֆրանսիական համալսարանի իրավունքի ամբիոնի դասախոս:
2009թ. դեկտեմբերի 6-ին Ազգային ժողովի պատգամավոր է ընտրվել թիվ 8 ընտրատարածքից: Հեղինակ է մի շարք գիտական հոդվածների, համահեղինակ` ուսումնական ձեռնարկի: Պարգեւատրվել է ՀՀ փաստաբանների միության պատվոգրով: Ունի արդարադատության երկրորդ դասի խորհրդականի դասային աստիճան, լեյտենանտի զինվորական կոչում: Ամուսնացած է, ունի երկու երեխա:
