Հայաստանի հանրապետական կուսակցությունը դեռ չի որոշել, թե երբ է հանրահավաք անցկացնելու փետրվարի 21-ին չկայացած հանրահավաքի փոխարեն, կամ առհասարակ նման հանրահավաք կլինի՞, թե՞ ոչ: ՀՀԿ խոսնակ Էդուարդ Շարմազանովը «168 ժամի» թղթակցին ասել է, որ դեռևս նորություն չկա ՀՀԿ-ի հավանական հանրահավաքի մասին, և իր տարածած նախկին հայտարարությանն ավելացնելու ոչինչ չունի:
Հիշեցնենք, որ փետրվարի 14-ին ՀՀԿ խոսնակն ասել էր, թե փետրվարի 21-ին իրենք տոնելու են հայ ժողովրդի հաղթանակը: «Նորություն չկա, երբ լինի՝ կհայտնենք»,- ասել է Էդուարդ Շարմազանովը: Հիշեցնենք նաև, որ ՀՀԿ-ն փետրվարի 21-ին Ազատության հրապարակի արտոնված հանրահավաքը չեղյալ հայտարարեց, քանի որ նույն օրը նախագահի թեկնածու Րաֆֆի Հովհաննիսյանն էր հավաք իրականացնում այնտեղ: Հանրահավաքի մեկնարկից ժամեր առաջ տարածված հայտարարության մեջ Էդուարդ Շարմազանովը նշել էր. «Վստահ ենք, որ շատ շուտով մեր ժողովրդի համար խորհրդանշական այդ վայրում բոլորս միասին կտոնենք ազատության և ժողովրդավարության այն հաղթանակը, որը մենք գրանցեցինք մեր երկրում 2013 թվականի նախագահական ընտրությունների ժամանակ»:
Ի պատասխան թղթակցի հարցին, թե արդյոք նոր հանրահավաքի անցկացման խոչընդոտն ա՞յն է, որ ՀՀԿ-ն անպայման ցանկանում է Ազատության հրապարակում հաղթանակը տոնել, իսկ Րաֆֆի Հովհաննիսյանն էլ այն «զբաղեցրել» է անորոշ ժամանակով, Էդուարդ Շարմազանովը պնդեց, թե խնդիրը պարտադիր Ազատության հրապարակում հանրահավաք անելը կամ չանելը չէ: Նրա խոսքով, հիմա շատ ավելի կարևոր խնդիրներ կան, քան այդ հանրահավաքը: «Կարծում եմ շատ ավելի կարևոր է, որ Րաֆֆի Հովհաննիսյանն արձագանքեր նախագահի երկխոսության կոչին և ոչ թե նրան հրավիրեր Ազատության հրապարակ: Երկխոսությունը ենթադրում է, որ երկու կողմերը նստում են սեղանի շուրջ և խնդիրներ են քննարկում, և ոչ թե մի քանի հազար կամ մի քանի հարյուր մարդու մոտ միտինգ են իրականացնում»,- ասել է Էդուարդ Շարմազանովը:
