Քաղաքական գիտության Հայաստանի ասոցիացիան, Վրաստանի սոցիալական գիտությունների կենտրոնը և Հայաստանում «Ֆրիդրիխ Էբերտ» հիմնադրամի ներկայացուցիչները համատեղ կազմակերպել էին «Հայաստանի և Վրաստանի՝ միմյանց հանդեպ իրականացվող քաղաքականության ընկալումները երկու երկրների երիտասարդության շրջանում. միֆեր, իրականություն» գրքի շնորհանդեսը։
«Առաջին լրատվական»-ի հետ զրույցում Վրաստանի սոցիալական գիտությունների կենտրոնի փորձագետ Քրիստինա Մարգվելաշվիլին ասաց, որ իրենց ուսումնասիրությունների համաձայն՝ Վրաստանի երիտասարդությունը բարեկամաբար է տրամադրված հայ ժողովրդի նկատմամբ: Միևնույն ժամանակ մեր զրուցակիցը նշեց, որ Գյումրիում գտնվող ռուսական ռազմաբազան Վրաստանի հասարակության մոտ բացասական տրամադրվածություն է առաջացնում:
Մեր այն հարցին, թե իր կարծիքով՝ դա և առհասարակ Ռուսաստանից ստացվող նոր զինատեսակները կարո՞ղ են օգտագործվել Վրաստանի դեմ, Մարգվելաշվիլին պատասխանեց. «Մեզ մոտ այն ընկալումն է, որ ռուսական ռազմաբազան Գյումրիում վտանգավոր է Վրաստանի համար, և օրինակ՝ Աբխազիայի կամ այլ կոնֆլիկտների հնարավոր վերսկսման դեպքում այն կարող է օգտագործվել Վրաստանի դեմ»:
Նա նաև նշեց, որ իրենք ցանկություն չունեն խնդիրն ուռճացնել այդ աստիճան և ասել, որ Ռուսաստանից ստացված ցանկացած զինատեսակ կարող է օգտագործվել Վրաստանի դեմ. «Բայց կրկնում եմ՝ ռուսական ռազմական ներկայությունը Հայաստանում կարող է օգտագործվել Վրաստանի դեմ»:
Ինչ վերաբերում է այն հարցին, որ Վրաստանը ստորագրել է Եվրամիության հետ Ասոցացման համաձայնագիրը, իսկ Հայաստանը դարձել Եվրասիական տնտեսական միության անդամ, մեր զրուցակիցն ասաց. «Մենք գիտենք, որ կան տարբերություններ մեր երկրների միջև, մենք ընտրել ենք տարբեր ուղիներ, բայց պատմական լավ և բարեկամական անցյալը թույլ կտա շարունակել բարիդրացիական հարաբերությունները: Վրացի երիտասարդությունը կարծում է, որ մենք պետք է հայերի հետ բարեկամ լինենք և չնայած բազմաթիվ տարբերություններին՝ շարունակենք գործակցել»:
Մարգվելաշվիլին հավելեց, որ կարող են որոշակի խնդիրներ լինել առևտրի ոլորտում՝ միևնույն ժամանակ նշելով, որ Վրաստանի եվրաասոցացումը Հայաստանի համար կարող է լավ հնարավորություն լինել եվրոպական շուկայից օգտվելու համար։
Ինչ վերաբերում է Իրանի ապաշրջափակմանը և Վրաստանի ու Հայաստանի առջև բացված նոր հնարավորություններին, մեր զրուցակիցն ասաց, որ երկու երկրները բավականին լավ հարաբերություններ ունեն Իրանի հետ, սակայն վստահ չէ՝ իրանական գազը Հայաստանով և Վրաստանով Եվրոպա արտահանելը հնարավոր կլինի՞, թե՞ ոչ:
