Հայաստանի տնտեսության մեջ շարունակվում են անկումային տեմպերը: Այս տարվա առաջին եռամսյակին, ինչպես նաև հինգ ամիսներին արձանագրված արտաքին առևտրաշրջանառության անկումը պահպանվում է:
Ազգային վիճակագրական ծառայությունը հրապարակել է 2015թ. առաջին կիսամյակի նախնական տնտեսական ցուցանիշները: Այդ տվյալների համաձայն՝ այս տարվա առաջին վեց ամիսներին Հայաստանի արտաքին առևտրաշրջանառությունը նախորդ տարվա նույն ժամանակահատվածի համեմատ նվազել է 29,8 տոկոսով: Եվ կրկին ներմուծման նվազումը ավելի քան կրկնակի անգամ ավելի է արտահանման նվազումից: Առաջին կիսամյակում եթե մեր երկրից արտահանվող ապրանքների ծավալը կրճատվել է 15,2 տոկոսով, ապա ներմուծման դեպքում այդ ցուցանիշը 38 տոկոս է:
Նման անկումների դեպքում հետաքրքիր է, որ ԱՎԾ-ն 3,8 տոկոս տնտեսական ակտիվություն է ցույց տվել: Հիշեցնենք, որ հինգ ամիսների կտրվածքով այդ ցուցանիշը 2,7 տոկոս էր: Այսինքն՝ վիճվարչությունն ասում է, որ հունիս ամսին մայիսի նկատմամբ տնտեսական ակտիվությունն աճել է 1,1 տոկոսով: Այսպիսի դրական զարգացում ապահովելու համար վիճակագիրներին հավանաբար օգնության է հասել գյուղատնտեսությունը, որը կիսամյակի տվյալներով գրանցել է 14,5 տոկոս աճ: Փոքր՝ 5,1 և 3,3 տոկոս աճ են գրանցել արդյունաբերության ու ծառայությունների ոլորտները: Այս տարվա առաջին կիսամյակին 1,5 տոկոս աճ է նշված նաև էլեկտրաէներգիայի արտադրության ոլորտում, որը մինչև հիմա անկում էր ունեցել: Իսկ հաջորդ խոշոր անկումը եղել է ներքին առևտրաշրջանառության մեջ, որն այս անգամ կազմել է 8,2 տոկոս:
Այս ցուցանիշների ֆոնին հետաքրքիր է հիշել մի հանգամանք՝ կառավարությունն իր Միջնաժամկետ ծախսերի ծրագրում այս տարվա համար նախատեսել է ընդամենը մեկ տոկոս աճ: Ու եթե առաջին կիսամյակում գրանցվում է 3,8 տոկոս տնտեսական ակտիվություն, ապա ողջ տարվա կտրվածքով ակնկալիքները պետք է որ առնվազն նույնքան լինեն: Չէ՞ որ սովորաբար տարվա առաջին ամիսներին է տնտեսական ակտիվությունը ցածր լինում և աշխուժանում է երկրորդ կեսից: Հատկապես, որ հենց երկրորդ կեսից է գյուղատնտեսական ոլորտը արդյունք տալիս: Իսկ Հայաստանի տնտեսության համար գյուղատնտեսական ոլորտը որոշիչ է, կարելի է ասել՝ փրկօղակ է:
Եվ այս պարագայում հակասություններ կան իշխանությունների հրապարակած տվյալների միջև: Հիշեցնենք նաև, որ տարեսկզբից միջազգային կառույցները զրո տոկոս աճ, անգամ մեկ տոկոս անկում էին կանխատեսում Հայաստանի տնտեսության համար: Մինչդեռ վարչապետ Հովիկ Աբրահամյանը իր մի քանի նախարարներով հայտարարում էր, թե տարեվերջին Հայաստանում գրանցվելու է մի քանի տոկոս աճ:
Եվ ահա, ԱՎԾ-ն այնպիսի տվյալներ է հրապարակել, որոնք համընկել են Հովիկ Աբրահամյանի ցանկությունների հետ: Թեև, իհարկե, չի բացառվում, որ Հայաստանի իշխանություններն ու վիճակագիրները չկարողանան տարեվերջին աճ ցույց տալ: Չէ՞ որ արտաքին առևտրաշրջանառության, ինչպես նաև տրանսֆերտների ու ներդրումների ծավալը նույնպես կտրուկ անկում է ունեցել:
Լուսանկարը՝ Photolure-ի