Մեծ Բրիտանիայի վարչապետ Դևիդ Քեմերոնը մուսուլմաններին կոչ է արել համատեղ դիմակայել արևմտյան արժեքների դեմ ծայրահեղականների դավադրության տեսություններին: Այս մասին հայտնում է RIA Novosti-ն:
«Դա տուն է, որը մենք միասին ենք կառուցում: Ով էլ լինեք՝ մուսուլման, հրեա, քրիստոնյա, թե սիկհ, որտեղ էլ ծնված լինեք՝ այստեղ, թե արտասահմանում, մենք բոլորս կարող ենք մեզ զգալ այդ երկրի մաս և պետք է համախմբվենք ու վստահությամբ և հպարտությամբ պաշտպանենք մեր արժեքները»,- հայտարարել է վարչապետը ծայրահեղականության դեմ պայքարին նվիրված ելույթում:
Նա նաև նշել է, որ դպրոցների և քոլեջների սովորողներին, որոնց դեպքում արմատականացման ռիսկ կա, հետևելու կառավարության նոր միջոցառումն ուղղված է երիտասարդների պաշտպանությանը, ոչ թե մուսուլմաններին «լրտեսելուն»:
«Մենք պետք է միասին դիմակայենք ծայրահեղականների անհեթեթ դավադրական տեսություններին: Աշխարհն իսլամի դեմ դավադրություն չի անում, անվտանգության ծառայությունները չեն կանգնած ահաբեկչական հարձակումների հետևում: Մեր նոր կանխարգելիչ միջոցառումը դպրոցների համար ուղղված չէ իսլամական երեխաներին լրտեսելուն կամ հանցագործ պատրաստելուն»,- հայտարարել է նա:
«Դա պարանոյայի ծայրահեղ աստիճանն է: Իրականում այդ միջոցը ծնողներին և ուսուցիչներին հնարավորություն է տալիս երեխաներին պաշտպանել ծայրահեղականության բոլոր ձևերից՝ լինի իսլամիստական, թե նեոնացիստական»,- նշել է Քեմերոնը:
