Georgia Online-ի փոխանցմամբ՝ Վրաստանի սահմանապահ ոստիկանությունը վստահեցրել է, որ հայ սահմանապահների կողմից սահմանը Վրաստանի տարածքի խորք տեղափոխելու մասին տեղեկատվությունը չի համապատասխանում իրականությանը։ Վրաստանի սահմանապահ ոստիկանության տարածած հայտարարությունում նշված է. «Հուլիսի 18-ին ԶԼՄ-ներում տարածված տեղեկատվությունն այն մասին, որ հայ-վրացական պետական սահմանը տեղափոխվել է Մառնեուլի շրջանի Տակազենդ գյուղ, չի համապատասխանում իրականությանը։ Նշված գյուղից երկու կիլոմետր հեռավորության վրա գտնվում է Վրաստանի ՆԳՆ-ի սահմանապահ ոստիկանության երրորդ վարչության թիվ 5 սահմանային սեկտորը (Սադախլո), որը սահմանային ռեժիմ է իրականացնում նույն տեղում՝ առանց սահմանային փոփոխության»։
Ավելի վաղ վրացական ԶԼՄ-ները հայտնել են, որ հայ սահմանապահները «յուրացրել են» 10-15 հեկտար։
