ԱԺ տարածքային կառավարման և տեղական ինքնակառավարման հարցերի մշտական հանձնաժողովը մարտի 11-ին Ստեփան Մարգարյանի նախագահությամբ տեղի ունեցած նիստում քննարկեց և դրական եզրակացություն տվեց «Հայաստանի Հանրապետության վարչատարածքային բաժանման մասին» ՀՀ օրենքում լրացումներ և փոփոխություններ կատարելու մասին» օրենքի նախագծին: Ինչպես նշեց հիմնական զեկուցող, ՀՀ կառավարությանն առընթեր անշարժ գույքի կադաստրի պետական կոմիտեի նախագահի տեղակալ Աշոտ Մուսայանը, ՀՀ համայնքների վարչական սահմաններից դուրս գտնվող տարբեր կատեգորիաների հողերը համայնքների վարչական սահմաններում ընդգրկելու ծրագրի հայեցակարգին համապատասխան` համայնքների վարչական սահմաններից դուրս գտնվող հողերը բաշխվել են դրանց սահմանակից գյուղական համայնքների միջև, քաղաքային համայնքների վարչական սահմաններում հողեր չեն ընդգրկվել: Հաշվի առնելով այն հանգամանքը, որ ՀՀ Արագածոտնի մարզի Ապարան քաղաքային համայնքում տարածված է անասնապահությունը, իսկ համայնքը չունի անհրաժեշտ արոտավայրեր, ուստի նախագծով նախատեսվում է փոփոխություն կատարել Արագածոտնի մարզի Ապարան քաղաքային, Վարդենիս և Նիգավան գյուղական համայնքների վարչական սահմաններում և Ապարան համայնքին նախկինում երկարաժամկետ օգտագործման իրավունքով տրամադրված, Վարդենիս և Նիգավան համայնքների վարչական սահմաններում ընդգրկված հողամասերն ընդգրկել Ապարան համայնքի վարչական սահմաններում: Այդ կապակցությամբ Վարդենիս և Նիգավան համայնքները տվել են իրենց համաձայնությունները` համապատասխանաբար 180.26 և 759.22 հա հողամասերը Ապարան համայնքի վարչական սահմաններում ընդգրկելու համար:
Նախագծով նախատեսվում է փոփոխություն կատարել նաև ՀՀ Վայոց Ձորի մարզի Գնդևազ, Զառիթափ և Արտավան գյուղական համայնքների վարչական սահմաններում, որը պայմանավորված է այն հանգամանքով, որ Զառիթափ համայնքի վարչական սահմաններում ընդգրկված հողերի մի մասը հանդիսանում է Գնդևազ համայնքի բնակիչների սեփականությունը և սեփականաշնորհման օրվանից առ այսօր օգտագործվում է նրանց կողմից: Այդ կապակցությամբ Զառիթափ համայնքը տվել է իր համաձայնությունը՝ 38.8 հա հողամասը Գնդևազ համայնքի վարչական սահմաններում ընդգրկելու համար:
Օրինագիծը կընդգրկվի ԱԺ գարնանային նստաշրջանի և առաջիկա քառօրյա նիստերի օրակարգերի նախագծերում:
