Վերաքննիչ քրեական դատարանում ավարտվեց Տիգրան Ա.-ի գործով բերված վերաքննիչ բողոքի քննությունը:
Գործը քննվել է Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում Արթուր Մկրտչյանի նախագահությամբ:
Ըստ մեղադրանքի՝ 18-ամյա Տիգրանը 2014 թվականի հոկտեմբերի 26-ին, ժամը 18-ն անց 45 րոպեին, գտնվելով ալկոհոլային խմիչք օգտագործած վիճակում, իր աջ ձեռքի նախաբազկի ներսի մակերեսին խոհանոցային դանակով քերծվածքներ է պատճառել: Կանչով նրանց բնակարան է եկել շտապօգնության բրիգադը: Տիգրանը իր ձեռքում եղած դանակը առաջ-հետ շարժելով՝ մոտեցել է շտապօգնության բժշկուհի Կ.-ին, սպանության սպառնալիք է տվել՝ ասելով. «Կսպանեմ»:
Նա, ըստ մեղադրանքի, ստեղծել է իր կողմից տրված սպառնալիքը իրագործելու իրական վտանգ:
Տիգրան Ա.-ին մեղադրանք է առաջադրվել ՀՀ քրեական օրենսգրքի 137 հոդվածի 1-ին մասով:
Ընդհանուր իրավասության դատարանում ամբաստանյալը հրաժարվել է պաշտպան ունենալու իրավունքից: Նա հայտնել է, որ դեպքի օրը՝ 2014 թվականի հոկտեմբերի 26-ին, ժամը 15-ին դուրս է եկել տնից՝ աշխատանք փնտրելու նպատակով: Արդյունքի չի հասել: Վերադարձել է տուն: Ժամը 17-ին հաց ուտելիս օգտագործել է 400 գրամ օղի, ապա նստել է համակարգչի դիմաց:
Որոշ ժամանակ անց ինքը չի հասկացել, թե ինչից շատ ուժեղ բարկացել է, սկսել է տարբեր ուղղություններով շպրտել ձեռքի տակ ընկած սպասքը, բջջային հեռախոսը, համակարգիչը: Դրանից հետո թե ինչ է արել՝ ոչինչ չի հիշում:
Տուժողը՝ շտապօգնության բժշկուհի Կ.-ն, հայտնել է, որ կանչով մեկնել են ամբաստանյալի բնակարան: Մուտքի դուռը բաց է եղել: Բրիգադը ներս է մտել: Հյուրասենյակի կենտրոնում տեսել է մի երիտասարդ տղայի, ում ձախ ձեռքին խոհանոցային մեծ դանակ կար:
Տղան իր ձեռքին եղած դանակով աջ ձեռքի նախաբազկի ներսի կողմից քերծվածքներ էր արել: Ինքը փորձել է մոտենալ նրան, բայց տղան հայհոյել է իրեն, ձախ ձեռքում եղած դանակը դեպի հետ տանելով՝ մի քանի անգամ բարձր բղավել է, թե կսպանի: Նա դանակը հետ ու առաջ տանելով՝ մոտեցել է իրեն:
Տղայի հայրը հրել է որդուն, այդ ժամանակ ինքն արագ հեռացել է բնակարանից:
Ընդհանուր իրավասության դատարանում տուժողը չի հաշտվել ամբաստանյալի հետ. տվյալ հարցը քննարկվել է, քանի որ այս հոդվածով ամբաստանյալի և տուժողի հաշտության դեպքում քրեական գործի վարույթը ենթակա կլիներ կարճման:
Դատահոգեբուժական փորձաքննության եզրակացությամբ՝ Տիգրան Ա.-ն հոգեկան հիվանդությամբ չի տառապել ու չի տառապում, մեղսունակ է, նա հանդիսանում է «հիստերիկ տիպի շեշտված անձ, դեպքի պահին տարել է իրավիճակով՝ խմածությամբ պայմանավորված հակազդում»:
Այս դեպքից առաջ՝ 2014 թվականի հունիսի 23-ին Տիգրան Ա.-ն ընդհանուր իրավասության նույն դատարանի կողմից խուլիգանության համար՝ ՀՀ քրեական օրենսգրքի 258 հոդվածի 2-րդ մասով, մեղավոր էր ճանաչվել ու դատապարտվել 100 հազար դրամ տուգանքի, որի վճարումը հետաձգվել էր 6 ամսով:
Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը տվյալ գործով՝ բժշկուհուն սպանության սպառնալիքներ տալու համար մեղավոր է ճանաչել Տիգրանին, դատապարտել 1 տարի ազատազրկման, այս պատժին լրիվ գումարել նաև նախորդ դատավճռով նշանակված 100 հազար դրամ տուգանքը:
Այս դատավճռի դեմ վերաքննիչ բողոք էր բերել արդեն այս փուլում Տիգրանի շահերի պաշտպանությունը ստանձնած փաստաբան Ռ. Չիբուխչյանը:
Վերաքննիչ քրեական դատարանում պաշտպանը ներկայացրեց ամբաստանյալ Տիգրան Ա.-ի դիմումը նախագահող դատավորին՝ տուժող բժշկուհու հետ հաշտվելու վերաբերյալ:
Պաշտպանը ներկայացրեց նաև նոտարական վավերացմամբ հաշտության համաձայնագիրը Տիգրանի ու բժշկուհու միջև:
Պաշտպան Չիբուխչյանը նշեց, որ Տիգրան Ա.-ն վճարել է նախորդ դատավճռով նշանակված 100 հազար դրամ տուգանքը, իսկ այս քրեական գործը պաշտպանը միջնորդեց կարճել՝ ամբաստանյալի և տուժողի հաշտության հիմքով:
Ամբաստանյալ Տիգրան Ա.-ն միացավ պաշտպանի միջնորդությանը: Նա ասաց, թե բոլորովին ոչինչ չի հիշում կատարված դեպքից, նույնիսկ չի հասկացել, որ իրենց տուն շտապօգնության բժիշկ է մտել: Զղջում է կատարածի համար, հասկանում է, որ շատ վատ բան է արել…
Բժշկուհի Կ.-ն ասաց, թե չի ցանկանում, որ իր պատճառով երիտասարդը կալանավայր ընկնի, որտեղ ոչ ոք չի ուղղվում. «Միայն կինոյում կարող են ուղղվել կալանավայր ընկնելուց հետո, իմ ապրած ոչ կարճ կյանքի ընթացքում ես նման բան չեմ տեսել… Թող ոչ մի երիտասարդ իմ պատճառով կալանավայրում չհայտնվի»:
Տուժողն ասաց, որ նյութական պահանջ չունի, այդ հարցից նույնիսկ տարակուսեց. «Դա բացառվում է»:
Մեղադրողը առարկեց պաշտպանի միջնորդության դեմ, ասաց, թե ամբաստանյալն ու տուժողը պետք է հաշտվեին մինչև դատավճռի կայացումը:
Դատավորի հարցին՝ վերաքննիչ ատյանում հնարավոր չէ՞ ամբաստանյալի և տուժողի հաշտությունը՝ ըստ դատախազի, վերջինս հստակ պատասխան չտվեց:
Վերաքննիչ քրեական դատարանը բեկանեց դատավճիռը, հաշտության հիմքով կարճեց քրեական գործը, դադարեցրեց Տիգրան Ա.-ի քրեական հետապնդումը:
