Ռոբերտ Քոչարյանը առաջիկայում կարտահայտի իր կարծիքը Սահմանադրության փոփոխությունների նախագծի վերաբերյալ: Այս մասին «Առաջին լատվական»-ի հետ զրույցում ասաց նախկին նախագահի գրասենյակի ղեկավար Վիկտոր Սողոմոնյանը:
Վերջինս, սակայն, չնշեց, թե Ռ. Քոչարյանը երբ կհայտնի իր կարծիքը, ընդամենն ավելացրեց, թե նա այս պահին Հայաստանում չէ, բայց կհրապարակի իր տեսակետները նոր հրապարակված նախագծի վերաբերյալ:
Հուլիսի 15-ին Սահմանադրական փոփոխությունների հանձնաժողովը հրապարակել է նախագծի 7 գլուխները, սակայն հանրությանը վաղուց էին հայտնի, թե իշխանություններն ինչ հիմնական փոփոխություններ են ցանկանում կատարել: Իշխանությունները մտադիր էին կիսանախագահական կառավարման համակարգի փոխարեն Հայաստանում ներդնել խորհրդարանական կառավարման համակարգ, ինչը և ամրագրված է հրապարակված նախագծում: Նաև նշված է, որ նույն անձը ընդամենը մեկ անգամ կարող է նախագահ դառնալ:
Հիշեցնենք, որ ընդամենը մի քանի ամիս առաջ ոչ իշխանական կուսակցությունները և այդ ժամանակ Ռ. Քոչարյանի հենարանը համարվող «Բարգավաճ Հայաստան» կուսակցությունը պնդում էին, թե իշխանությունները ու հատկապես Սերժ Սարգսյանը սահմանադրական փոփոխությունները նախաձեռնում են վերարտադրվելու համար, իսկ ապագա Սահմանադրության մեջ նախագահի համար վերընտրվելու սահմանափակում դնելով՝ ցանկանում են կանխել առաջիկա ընտրություններին նախկին նախագահների, մասնավորապես՝ հենց Ռ. Քոչարյանի առաջադրվելը:
Ինչպես հայտնի է, Ռ. Քոչարյանը նախկինում արդեն անդրադարձել է նախաձեռնվող փոփոխություններին և բացասական դիրքորոշում արտահայտել: «Առաջին հարցը, որ ծագում է իմ մեջ՝ արդյոք հասունացե՞լ է այդպիսի բարեփոխումն ընդհանրապես: Ինչքանո՞վ է Սահմանադրությունը խանգարում իշխանություններին համարժեք արձագանքելու առաջ եկող մարտահրավերներին: Կարող եմ վստահորեն ասել, որ չկա երկրի առջև ծառացած ոչ մի կենսական խնդիր, որի լուծմանը խոչընդոտի գործող Սահմանադրությունը»,- մոտ մեկ տարի առաջ տված հարցազրույցում ասել էր Ռ. Քոչարյանը:
Իսկ ինչ վերաբերում է նախագահների վերընտրմանն ուղղված սահմանափակմանը, նա ասել էր, թե դրա համար «Սահմանադրությունը» վերաձևելու կարիք չկա: «Պետք է ընդամենը գործող Սահմանադրության 50-րդ հոդվածից հանել «անընդմեջ» բառը: Ընդամենը մեկ բառ: Սակայն այդ լրացումը հետադարձ ուժ ունենալ չի կարող և այդպիսով ներկա քաղաքական լանդշաֆտի վրա ոչ մի կերպ չի ազդի»,- ասել էր Ռ. Քոչարյանը:
Իսկ մի քանի ամիս առաջ տված հարցազրույցում, վերահաստատելով իր վերը նշված կարծիքը, այսպես էր նշել. «Միամտություն կլինի կարծել, թե խորհրդարանական մոդելը ինքնաբերաբար կբերի ժողովրդավարական և մրցակցային կուսակցական միջավայրի առաջացման: Շատ ավելի հավանական է, որ այն կահագնացնի Հայաստանում արմատավորված ու նրա դժբախտություններից մեկը հանդիսացող հովանավորչական կառավարումը»: