Ստամբուլի հայկական «Ակօս» թերթի փոխանցմամբ՝ Թուրքիան ընդունել է ՄԱԿ-ի Մարդու իրավունքների հարցերով հանձնաժողովի ներկայացրած 278 բարեփոխումներում ու օրենսդրական ուղղումներից 203-ը, իսկ մնացյալ 75-ը մերժել է։
Մերժվածների թվում է հայտնվել նաև քրեական օրենսգրքի սկանդալային 301-րդ հոդվածի վերացնելը, որով ժամանակին մեղադրանք են ներկայացրել «Ակօս»-ի նախկին խմբագրապետ Հրանտ Դինքի նկատմամբ։ Ընդգծվում է, որ ՄԱԿ-ի հանձնաժողովը հետազոտություն է անցկացնում տարբեր երկրներում և յուրաքանչյուր 5 տարին մեկ ներկայացնում է իր առաջարկները։
Թուրքիայի քրեաիրավական միության նախագահ Ֆիքրիթ Իլքիզը հայտարարել է, որ իրենք դեմ են 301-րդ հոդվածը վերացնելուն և չեն կարծում, թե այն խախտում է խոսքի ազատությունը։
301-րդ հոդվածի առաջին կետը հանցանք է ճանաչում այն, «եթե որևէ մեկը հրապարակավ կվիրավորի թուրքականությունը (թուրքական ինքնագիտակցությունը), հանրապետությունը կամ Թուրքիայի Ազգային մեծ ժողովը (ԹԱՄԺ)»։ 2008 թվականին կատարված փոփոխություններով «թուրքականություն» բառը փոխարինվեց «թուրք ազգ» արտահայտությամբ։
Հիշեցնենք, որ 2008 թվականին հաղորդվել էր, որ վերջին 5 տարիներին Թուրքիայում 301-րդ հոդվածով 6745 քաղաքացու նկատմամբ քրեական գործ է հարուցվել, որոնցից 745-ը դատապարտվել են: Տասնյակ թուրք գրողներ դատապարտվել են 301-րդ հոդվածով` Օսմանյան կայսրությունում 1915 թվականին իրականացված Հայոց ցեղասպանության մասին հրապարակավ արտահայտվելու համար, ինչը գերազանցել է պաշտոնապես թույլատրելի կարծիքը:
