Ռուսական Vedomosti թերթին տված հարցազրույցի ժամանակ ԵԱՀԿ Մինսկի խմբի ամերիկացի համանախագահ Ջեյմս Ուորլիքն անդրադարձել է Ղարաբաղյան հակամարտության կարգավորման վրա ռուս-ամերիկյան հարաբերությունների ազդեցության հնարավորությանը։
«Հարաբերություններում (ԱՄՆ-ի ու Ռուսաստանի միջև) կա լարվածություն, որը չի վերաբերում մեր հարցին։ Սա մի ոլորտ է, որտեղ իսկապես համընկնում են Վաշինգտոնի ու Մոսկվայի հայացքները։ Ես սերտորեն աշխատում եմ իմ ռուս գործընկերոջ հետ, և մենք իրերին նայում ենք միանման։
Մենք համատեղ աշխատում ենք այդ կարգավորման մի շարք ասպեկտների ուղղությամբ՝ քաղաքական բաղադրիչ, բանակցությունների հիման վրա կարգավորման ուղիների փնտրտուք, վստահության ամրապնդում, մարդասիրական ոլորտի զարգացման ծրագրեր։
Սա ոլորտ է, որում ԱՄՆ-ն ու Ռուսաստանն աշխատում են համատեղ։ Եվ ես դա կմատնանշեի որպես դիվանագիտության, փոխգործակցության, շատ կոնկրետ ուղղության օրինակ, որը հուսով ենք՝ վերջիվերջո կարգավորման կհանգեցնի Հարավային Կովկասում։ Ղարաբաղյան հակամարտության կարգավորումը այն ոլորտը չէ, որ մենք խնդիրներ ենք տեսնում Ռուսաստանի հետ հարաբերություններում։ Ընդհակառակը՝ սա այն ոլորտն է, ուր մենք համագործակցում ենք, որպեսզի դիվանագիտական ճանապարհով հասնենք խաղաղ կարգավորման։ Եվ մենք շարունակելու ենք անել դա»,- ասել է ամերիկացի համանախագահը։
